«Ҳар бир шаҳар ва қишлоқда — замонавий китоб дўкони» акцияси доирасида «Намунали китоб дўкони» танловининг Тошкент шаҳар босқичи ўтказилди. Бу ҳақда «Дарё»га Матбуот ва ахборот агентлиги ахборот хизмати маълум қилди.
Китоб дўконлари фаолиятини қўллаб-қувватлаш орқали аҳолига намунали хизмат кўрсатиш сифатини ошириш мақсадида Наврўз байрами арафасида ғолибни аниқлаш учун идоралараро ишчи гуруҳи тузилиб, белгиланган меъзонлар асосида пойтахтдаги китоб дўконлари фаолияти баҳоланди.
Тошкент шаҳар ҳокимлиги, Тошкент шаҳар матбуот ва ахборот бошқармаси, Ўзбекистон ёшлар иттифоқи Тошкент шаҳар кенгаши, Ёзувчилар уюшмаси ҳамкорлигида ташкил этилган мазкур танловда «Шарқ зиёкори» МЧЖ Тошкент шаҳридаги «Намунали китоб дўкони» танловининг ғолиби деб топилиб, ташкилотчилар томонидан махсус диплом билан тақдирланди.
