Туркманистон президенти Гурбангули Бердимуҳамедовнинг «Спорт — бу дўстлик, соғлик ва гўзаликка элтувчи йўл» китобининг тақдимоти бўлиб ўтди. Бу ҳақда «Туркманистон — олтин аср» нашрига таяниб, «РИА Новости» хабар берди.
Туркманистон президенти адабиётга катта эътибор қаратади. Мамлакат президенти жорий йилнинг ўзида иккита китобини тақдим этишга улгурди: ҳарбийлар ва ички ишлар органлари ҳақида. Ўтган йили эса Туркманистон президентининг турли мавзулардаги олтита китоби — туркман гиламлари, мусиқаси, мақоллари, ахалтека отлари ва бошқа нарсаларга бағишланган китоблари тақдим этилган.
Янги китобнинг тақдимотида Туркманистон парламенти ва ҳукумати аъзолари, ҳуқуқни муҳофаза қилиш органлари раҳбарлари, спорт, жамоат ишлари, шунингдек, ОАВ вакиллари иштирок этди.
Китоб жисмоний тарбия ва спортнинг инсон ҳаётига ва жамиятдаги фойдасига бағишланган. Китобда Туркманистонда спорт ҳаракатларини ривожлантириш учун кўрилган чора-тадбирлар, эришилган юксак марралар, туркман халқининг кўп асрлик миллий спорт ўйинлари ҳақида сўз боради.
Янги китобда асосий эътибор Ашхободдаги ёпиқ иншоотларда бўлиб ўтган V Осиё ўйинлари ва Туркманистон умумжамоа ҳисобида ғалаба қозонган жанг санъатларига қаратилган
Китоб Туркманистон давлат нашриёти томонидан инглиз ва рус тилларида чоп этилди.
