30 апрель куни Россиянинг йирик «Либрика» нашриётининг ижодий гуруҳи Самарқандга ташриф буюрди. Ижодкорлар икки кун давомида Самарқанднинг тарихий обидалари, муқаддас қадамжолари ва мустақиллик йилларида барпо этилган бино ва иншоотлар ҳамда Сиёб бозорида суратга олиш ишларини олиб борди, деб хабар беради Ўзбекистон туризмни ривожлантириш давлат қўмитаси матбуот хизмати.
Ижодий гуруҳ Самарқанд палови, машҳур Самарқанд нони ва Нўхот шўрак таомининг тайёрланиш жараёнига алоҳида эътибор қаратди.
Таъкидлаш жоизки, «Либрика» нашриёти ўзининг китобида миллий ошхона, маросим ва урф-одатлар, архитектура ёдгорликларини ёритишни режалаштирган.
Нашр ёзувчиси ва сураткаши ўзбек маданияти, урф-одати ва турмуш тарзининг хилма-хиллигини қамраб олиш мақсадида Тошкент, Бухоро ва Шаҳрисабзга ҳам ташриф буюради.
