Россиянинг Ингушетия республикасида махсус операция чоғида беш нафар жангари ўлдирилди. Бу ҳақда Миллий аксилтеррор қўмитаси (МАҚ) ахборот маркази маълум қилди, дея хабар беради «Интерфакс».
«Малгобек шаҳрида комплекс махсус операция ва Назрань шаҳрида аксилтеррор операция ўтказилиши давомида ашаддий қуролли қаршилик кўрсатган беш нафар жангари йўқ қилинди, уч нафари қўлга олинди», — дейилади МАҚ ахборот маркази хабарида. Тўқнашувлар жойидан автомат қурол, граната ва тўппончалар мусодара этилган.
Тинч аҳоли ва ҳуқуқ-тартибот ходимлари орасида йўқотишлар бўлмаган. Ҳозирда Малгобек ва Назрань шаҳрида зарур тезкор қидирув тадбирлари давом этмоқда, тергов гуруҳи ишламоқда. Жангарилар яширинган бинолар, шунингдек, улар фойдаланган автомобиль кўздан кечирилмоқда.
