Чеченистон раҳбари Рамзан Қодиров ўзбекистонлик боксчи Руслан Чагаев ва унинг жамоаси учун чечен ўрмонига экскурсия уюштирди. Бу ҳақда Қодировнинг ўзи Instagram’даги саҳифасида маълум қилди.
«Биринчи қилган ишимиз, туристик база жойлашган ўрмонга бориш бўлди. Бу ернинг табиати бокира. Тоза ҳавода кабоб тановул қилдик. Лукас Браун билан бўладиган бўлажак жанг масалаларини муҳокама қилдик. Мураббийлар ва Русланнинг ўз ўйлаб қўйган режалари бор, улар ҳақида ҳозирча гапиришмади. Кечқурунга яқин қўриқхонада бўлдик, табиий шароитларда ҳаёт кечирадиган ёввойи ҳайвонларни кузатдик», — деб ёзди Қодиров.
Эслатиб ўтамиз, Руслан Чагаев ва Лукас Браун ўртасидаги жанг 5 март куни Грозний шаҳрида бўлиб ўтади.
