Ҳиндистонда мамлакатнинг 29-штатини ташкил этиш жараёни расман 2 июнь душанба куни, штат бош вазири Калвакунта Чандрашекара Раонинг қасамёд қилиш маросими билан якунига етди. Бу ҳақда Gazeta.uz хабар бермоқда.
«Телангана тараққиёт йўлимизда бизнинг кучимизга куч қўшади», – дея Ҳиндистон бош вазири Нарендра Модининг сўзларидан иқтибос келтирмоқда Agence France-Presse. Ҳиндистон раҳбари штат етакчисини ушбу тайинланув билан биринчилардан бўлиб табриклаган.
Янги штатни ташкил қилиш ҳақидаги принципиал қарор 2013 йил июлда қабул қилинган, 2014 йилнинг февралида эса Ҳиндистон парламентининг юқори палатаси жанубдаги Андхра-Прадеш штатининг Телангана ҳудудини алоҳида 29-штатга айлантириш тўғрисидаги қонун лойиҳасини қабул қилган эди.
«Кун»нинг ёзишича, Телангана Андхра-Прадеш бюджетига тушадиган даромадларнинг 60 фоизини келтиради, бу ерда штатнинг 40 фоиз аҳолиси истиқомат қилади. Ҳудуднинг штат таркибидан ажралиб чиқишга бўлган интилиши ҳудуд аҳолиси Андхра-Прадеш штати раҳбарияти вилоятни ривожлантириш учун етарлича эътибор қаратмаяпти, деган хулосага келганидан сўнг бошланган эди.
Телангананинг Андхра-Прадешдан ажралиб чиқишига эса қирғоқбўйидаги Симандхра ҳудуди аҳолиси қарши чиққан – уларнинг фикрича, агар Телангана штат таркибидан ажралиб чиқадиган бўлса, у ҳолда қирғоқбўйидаги аҳоли камроқ электр қуввати, ичимлик суви, молиявий даромадлар олади.
Янги штат ташкил этилишига бағишланган байрам тантаналари кейинги ўн йил давомида ҳам Андхра-Прадеш, ҳам Телангана учун пойтахт вазифасини бажарадиган Ҳайдарободда мушакбозлик билан бошланди. 10 йилдан сўнг Телангана шаҳри янги ҳудудий бирликнинг пойтахтига айланади.
