АҚШнинг Пенсильвания штатидаги Филадельфия шаҳрида икки яшар бола ўзининг ўн бир ёшли опасини тўппончадан отиб қўйди. Бу ҳақда 6 апрель куни шаҳар полицияси вакиллари хабар беришди, деб ёзади «ИТАР-ТАСС».
Хабарга кўра, бола ўқланган тўппончани ота-онасининг ётоқхонасидан топиб олган ва опасини отган. Ўқ қизнинг кўкрагига теккан; уни касалхонага элтишган, аммо жонини сақлаб қолишнинг иложи бўлмаган.
Полициячиларнинг айтишларича, бу пайтда болаларнинг онаси уйда бўлган, аммо ўз юмушлари билан нариги хонага чиққан. Болалар қаровсиз қолдирилган бир неча дақиқа ичида шу фожиа юз берган.
Кейинчалик аниқланишича, уйга тўппончани шу хонадоннинг дўсти келтирган бўлган.
Ҳозирча бу иш бўйича ҳеч кимга айблов эълон қилинмаган. Маҳаллий оммавий ахборот воситаларининг таъкидлашларича, қизнинг ўлимини бахтсиз ҳодиса сифатида қайд этишлари мумкин.
