“Tashabbusli byudjet” dasturi doirasida majburiy ovoz to‘plangani aniqlangan loyihalar ovoz berish bosqichidan chetlatiladi. Iqtisodiyot va moliya vazirligi fuqarolarga tegishli eslatma bilan chiqdi.
Ijtimoiy tarmoqlarda Farg‘ona viloyati Quva tumanidagi 37-maktabda majburiy ovoz berish holatlari yuzasidan xabarlar tarqaldi. Iqtisodiyot va moliya vazirligining bildirishicha, mazkur holatlar tegishli vakolatli organlar tomonidan o‘rganilib, haqiqatan ham ushbu maktabda xodimlar majburiy ovoz berishga jalb etilgani tasdiqlandi.
Shu munosabat bilan vazirlik tomonidan mazkur maktabda majburiy ovoz to‘plangan loyihalarni ovoz berish bosqichidan chetlatish yuzasidan tegishli tuman Xalq deputatlari kengashiga taqdimnoma yuborildi.
Maktabgacha va maktab ta'limi vaziri Hilola Umarova Quva tumanidagi maktablarning birida o‘qituvchilarning oylik maoshidan ovoz yig‘ish uchun 700 ming so‘mdan ushlab qolishni talab qilgan direktor bilan mehnat shartnomasini bekor qilinganini aytgandi.
“Tashabbusli byudjet” jarayoni doirasida majburiy ovoz berishga jalb etish — majburiy mehnat sifatida tasniflanishi belgilangan. Vazirlik ovoz to‘plashga majburlash holatlariga duch kelgan fuqarolardan zudlik bilan Kambag‘allikni qisqartirish va bandlik vazirligining 71 200-06-00 ishonch raqamiga qo‘ng‘iroq qilishlarini so‘radi.
“O‘z ovozingizni qadrlang, uni faqat o‘zingiz munosib deb bilgan loyihaga bering”, deyiladi Iqtisodiyot va moliya vazirligi xabarida.
“Tashabbusli byudjet”ning 2025-yilgi 1-mavsumi doirasida ovoz berish bosqichi 11-mart kuni boshlangandi. Ushbu bosqich 20-mart soat 23:59 gacha davom etadi.
Izoh (0)