Toshkent shahar FVB boshlig‘i o‘rinbosari pora olishda gumonlanib qamoqqa olindi.
-XTyymaGR.avif)
Uning noqonuniy harakatlari korrupsiyaga qarshi kurashish doirasida Davlat xavfsizlik xizmati organlari tomonidan olib borilgan tezkor-qidiruv tadbirlari davomida fosh etilgan.
Jumladan, mazkur mansabdor shaxs o‘z xizmat mavqeyini suiiste’mol qilib, Toshkent shahrida qurilishi rejalashtirilgan binolarning eskiz loyihasini tasdiqlash, yong‘indan avtomatik tarzda xabar beruvchi qurilmalar bo‘yicha tuzilgan dalolatnomalarni imzolash hamda yangi qurilgan yoki rekonstruksiya qilingan binolarni Davlat qabul komissiyasiga foydalanishga topshirilishida ijobiy xulosa berish evaziga doimiy ravishda tamagirlik yo‘li bilan pora olib kelgan.
Bunday obyektlar ichida umumiy o‘rta ta’lim maktabi va tibbiyot muassasasi binolari ham bo‘lgan.
Hozirda mazkur shaxsga nisbatan Jinoyat kodeksining tegishli moddalari bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llangan. Dastlabki tergov harakatlari olib borilmoqda.
2025-yilning yanvarida Namangan viloyati Pop tumani favqulodda vaziyatlar bo‘limi boshlig‘i 160 ming dollar olayotganida qo‘lga tushgandi. Sirdaryo viloyati Sayxunobod tumani Favqulodda vaziyatlar bo‘limining tezkor bo‘linmasi boshlig‘i ham noqonuniy ravishda 7 ming dollar olayotganida ushlangandi.
Fevral oyining oxirlari va mart oyi boshlarida FVV rahbari va uning ikki o‘rinbosari ishdan olinib, yangilari tayinlangandi. Shavkat Mirziyoyev qurilishga ruxsat berish, binoni topshirishda yong‘in xavfsizligi bo‘yicha byurokratiya va qonun buzilish ko‘payib ketgani uchun favqulodda vaziyatlar vaziri va uning o‘rinbosarlari ishdan olinganini aytgandi.
Izoh (0)