Davlat xavfsizlik xizmati Qashqadaryo va Jizzax viloyatlarida korrupsiya hamda firibgarlik holatlariga chek qo‘ydi.
“Xavfsiz daryo boshqarmasi” davlat muassasasining Qashqadaryo viloyati bo‘linmasi mansabdor xodimi Qarshi tumanida istiqomat qiluvchi fuqaro tomonidan maxsus texnikalar yordamida “Qashqadaryo” daryosi atrofidan noqonuniy ravishda qum qazib olayotganlik holatini aniqlagan.
Shundan so‘ng unga nisbatan chora ko‘rmaslik va ushbu noqonuniy holat yuzasidan jarima maydonchasiga joylashtirilgan ekskavator-yuklagich texnikasini chiqarib berish, shuningdek, kelgusida qum qazib olishida rahnamolik qilish evaziga 3 ming dollar olgan vaqtida ashyoviy dalillar bilan ushlandi.
Holat yuzasidan ushbu mansabdor shaxsga nisbatan Jinoyat kodeksining 210-moddasi 2-qismi “v” bandi (pora olish tamagirlik yo‘li bilan) bilan jinoyat ishi qo‘zg‘atilib, qamoq ehtiyot chorasi qo‘llanildi.
Boshqa holatda esa Surxondaryo viloyatidagi qurilish obyektlarida nazorat o‘lchov faoliyatini amalga oshiruvchi MCHJning yetakchi mutaxassisi Jizzax viloyatida qurilish faoliyati bilan shug‘ullanuvchi MCHJ mansabdor shaxslariga nisbatan yordam berishni vaʼda qiladi.
Xususan qurilish bilan shug‘ullanuvchi shaxslarga nisbatan may oyida prokuratura organlari tomonidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan qo‘zg‘atilgan jinoyat ishi doirasida, ushbu MCHJ tomonidan Yangiobod tumanida amalga oshirilgan qurilish ishlari bo‘yicha o‘tkazilgan nazorat o‘lchovida aniqlangan qo‘shib yozish holatlarini tekshiruv xulosasida ko‘rsatmaslik hamda tanishlari orqali tergov jarayonlarida yengillik yaratib berish evaziga 400 mln so‘m talab qiladi.
O‘tkazilgan tezkor tadbirda yetakchi mutaxassis talab qilingan pul mablag‘idan 150 mln. so‘m olgan vaqtida ushlandi.
Holat bo‘yicha qonunbuzarga nisbatan Jinoyat kodeksining 25,168-moddasi 3-qismi “a”, “v” bandlari (firibgarlik ko‘p miqdorda, xizmat mavqeidan foydalangan holda) hamda 28,211-moddasi 2-qismi “b” bandi (pora berish ko‘p miqdorda sodir etilgan bo‘lsa) bilan jinoyat ishi qo‘zg‘atilib, qamoq ehtiyot chorasi qo‘llanildi.
Izoh (0)