Eronlik taniqli qo‘shiqchi Arash 2017-yilda Toshkentda bo‘lib o‘tishi rejalashtirilgan konsertiga oldindan gonorar olgan bo‘lsa-da, kelmagan. Shu tufayli o‘zbekistonlik tadbirkor 50 ming dollar zarar ko‘rgan. 2018-yilda Toshkent viloyati xo‘jalik sudi tadbirkorning foydasiga 24 797 AQSH dollari miqdoridagi zararni qoplash to‘g‘risida qaror chiqargan, ammo qaror hamon ijro etilgani yo‘q.
Inson huquqlari faoli Abdurahmon Tashanovga ko‘ra, Andijondagi festival paytida qonun sinovdan o‘tadi.
Festival tashkilotchilari xizmati 50 ming dollar ham turmaydigan bu sanʼatkorni 2 milliard so‘mga olib kelishmoqchi. Demak, qonun sinovdan o‘tadi: O‘zbekistonda sud qarorlari ustuvormi yoki bu mojaro asrlar sadosi shovqinida beiz ketadimi, ko‘ramiz, deydi bu haqda yozgan huquq faoli.
“Daryo” jurnalisti 2017-yildagi konsert tashabbuskori, Arash sabab 50 ming dollar zarar ko‘rgan “Nigora media group” MCHJ taʼsischisi Nigora Soimning ham bu haqdagi fikri bilan qiziqdi.
Arash O‘zbekistonning sud tizimi ustidan haligacha kulib, masxara qilib keladi. Sud qarorini bajarmay, qochib yuribdi. Bu masalani eshitmaganlar qolgan deb o‘ylamayman. Yaqinda korrupsiya agentligidanman deb birov chiqdi, yana boshqasi Andijondagi tashkilotlardan dedi va mendan maʼlumotlarni so‘rab olishdi. Barchasini bilishdi. Lekin barchasini bila turib, xizmati 50 ming dollar ham turmaydigan xonandaga 2 milliard so‘m taxminan 165 ming dollar to‘lashmoqchiligi kulgili va ayanchli. Bu voqealarni bilishmaganda ham mayli edi, deydi Nigora Soim.
Arash O‘zbekiston sudi qaroriga ko‘ra bu harakati uchun 25 ming dollar jarima to‘lash majburiyatini olgan. Toshkent viloyati xo‘jalik sudiga ko‘ra, Arash vakili bo‘lgan Extensive Music Sweden AB kompaniyasi “Nigora media group” prodyuserlik kompaniyasi bilan tuzilgan shartnomani buzganlikda aybdor deb topilgan. Nigora Soim MIB hamon ushbu qaror ijrosini taʼminlamaganini aytib, “Ijrochilarimizning kuchi MDHdan tashqariga yetmas ekan”, deydi.
“Daryo” jurnalisti Bosh prokuratura huzuridagi Majburiy ijro byurosi axborot xizmati bilan bog‘lanib, Toshkent viloyati xo‘jalik sudining 2018-yildagi qarori ijrosi taʼminlanmagani sababi bilan qiziqdi. MIB matbuot kotibi Farrux Toshpo‘latov jurnalistning “Arash erta indin Andijonga festivalga kelsa, MIB sud qarori ijrosini taʼminlaydimi”, deya berilgan savoliga javob berar ekan “bu ish bo‘yicha MIBga ijro hujjati yetib kelmagan”, dedi.
Masʼulning tushuntirishicha, Arashdan jarima undiruvchi tashkilot “Nigora media group” prodyuserlik kompaniyasi ijro hujjatini qaytarib olgan. Shu sabab MIB sud qarori ijrosini taʼminlay olmagan.
Nigora Soim MIB masʼuli bu borada yolg‘on maʼlumot berayotganini aytdi.
Yo‘q, bu yolg‘on. Necha marotabalab borganman, qabul qilishmagan. To‘polon bilan hujjat topshirib kelganlarimni qaytarib yuborishgan. Ijrosini qilolmaymiz deyishgan. Tarixni qo‘ya turaylik, hozirgi kunlarning o‘zida arizam yana ularga Bosh prokuraturaga kelib tushgan. Shu ish bilan shug‘ullanayotgan MIBning Shuhrat ismli xodimi “Murojaatingiz kelib tushganiga uch kun bo‘lmasdan qaytaraman. Bu ish ijrosini biz qilolmaymiz degan”, deydi Nigora Soim.
“Daryo” voqealar rivojini kuzatishda davom etadi.
Izoh (0)