Prezident Shavkat Mirziyoyev 12-avgust kuni Hindiston bosh vaziri Narendra Modi bilan telefon orqali muloqot qildi. Bu haqda Prezident axborot xizmati xabar berdi.
Suhbat avvalida O‘zbekiston prezidenti Narendra Modi va hind xalqini yaqinlashib kelayotgan Hindiston mustaqilligi kuni bilan tabriklagan.
Suhbatda O‘zbekiston—Hindiston strategik sheriklik va ko‘p qirrali hamkorlik munosabatlarini yanada rivojlantirish masalalari ko‘rib chiqilgan.
“Joriy yil boshidan tovar ayirboshlash 60 foizga oshdi, 40 ga yaqin yangi qo‘shma korxona va kooperatsiya loyihalari ishga tushirildi. Hindistonning yetakchi kompaniyalari bilan amalga oshirilayotgan istiqbolli loyihalarning joriy portfeli ikki milliard dollarga yetdi. O‘zbekistonda Hindiston universitetlarining to‘rtta filiali muvaffaqiyatli faoliyat yuritmoqda”, deyiladi manbada.
Muloqotda farmatsevtika, kimyo sanoati, raqamli iqtisodiyot, energetika, konchilik, qishloq xo‘jaligi, qurilish, turizm va boshqa yo‘nalishlarda kooperatsiya loyihalarini ilgari surish va amalga oshirishga alohida eʼtibor qaratilgan.
Xabarga ko‘ra, “Shimol—Janub” yo‘lagi doirasida samarali transport-tranzit yo‘nalishlarini rivojlantirish ham muhokama qilingan.
Hukumatlararo komissiyaning navbatdagi yig‘ilishini Toshkent shahrida samarali o‘tkazish muhimligi qayd etilgan. Madaniyat va kino kunlarini o‘zaro tashkil etish, hududlar darajasida almashinuvlarni faollashtirish taklif qilingan.
O‘zbekiston prezidenti va Hindiston bosh vaziri mintaqaviy kun tartibi yuzasidan ham fikr almashgan. Bunda bo‘lajak oliy darajadagi tadbirlar rejasi ko‘rib chiqilgan.
Izoh (0)