Quyoshda yirik toj teshigi paydo bo‘lib, kattalasha boshlagan. Bu haqda Rossiya Fanlar akademiyasi Kosmik tadqiqotlar instituti (KTI) Quyosh astronomiyasi laboratoriyasi o‘zining Telegram kanalida xabar berdi.
“Bir necha kundan buyon Quyoshning Yerga qaragan tomonida katta toj teshigi o‘sib bormoqda. So‘nggi sutka ichida uning maydoni va o‘lchamlari ayniqsa tez o‘sdi, taxminan 50 foizga kengaydi”, deyiladi xabarda.
Laboratoriya mutaxassislarining tushuntirishicha, bir necha kundan so‘ng bu hodisa Yer atrofidagi quyosh shamoli tezligining oshishiga olib keladi. Bu esa o‘z navbatida sayyoramizdagi geomagnit vaziyatga ta’sir ko‘rsatishi mumkin.
Olimlarning ta’kidlashicha, teshik hududida quyosh shamolining g‘oyat tez va zich oqimi kutilmoqda. Bunday xulosaga Quyosh atmosferasining nafaqat yuqori, balki quyi qatlamlarida ham kuchli qorayish kuzatilayotgani asosida kelindi. Odatda, nurlanuvchi modda atmosferaning quyi qatlamlaridan juda kam hollarda chiqib ketadi.
“Aniqlanishicha, 18-avgust, dushanba kuni Yer atrofida quyosh shamoli tezligi orta boshlaydi va 19-20-sanaga kelib soniyasiga 800-900 kilometrgacha yetib, g‘ayritabiiy yuqori darajaga ko‘tarilishi mumkin. Bu ko‘rsatkich odatdagi qiymatlardan 2-2,5 baravar yuqori hisoblanadi”, deydi mutaxassislar.
Hozirda olimlar quyosh shamolining bunday kuchayishini yaqin yetti-o‘n kun ichida geomagnit vaziyatga ta’sir etuvchi asosiy omil sifatida baholamoqdalar. Ular shu vaqtgacha, jumladan, yaqin dam olish kunlarida ham, Yerning magnit maydoni barqaror bo‘lishini ta’kidlashgan.
Bundan avval 2025 PM nomli diametri 50 metr bo‘lgan asteroid 17-avgust kuni Yerga taxminan 384 ming kilometr masofagacha yaqinlashishi ma`lum qilingandi.
Izoh (0)