Yevropa futbol assotsiatsiyalari ittifoqi (UEFA) Isroil kuchlari tomonidan o‘ldirilgan Falastin milliy terma jamoasi sobiq a’zosi Sulaymon al-Ubaydga bag‘ishlab xotira posti e’lon qildi. “Liverpul” hujumchisi Muhammad Saloh esa UEFAni o‘lim tafsilotlarini aytib o‘tmagani uchun tanqid ostiga oldi.
Falastin futbol assotsiatsiyasi (PFA) ma’lumotiga ko‘ra, “falastinlik Pele” nomi bilan tanilgan 41 yoshli Al-Ubayd G‘azo janubida gumanitar yordam uchun navbat kutayotgan vaqti Isroil kuchlari tomonidan uyushtirilgan hujum qurboni bo‘lgan. UEFA ijtimoiy tarmoqlardagi qisqa postida uni “eng og‘ir davrlarda ham minglab bolalarga umid bergan iste’dod” deya ta’rifladi.
“U qanday, qayerda va nima sababdan vafot etganini ham ayta olasizmi?”, deb yozdi Muhammad Saloh UEFAga murojaat qilib.
Yevropa futbol assotsiatsiyalari ittifoqi esa hozircha bunga izoh bermadi.
Falastin futbol assotsiatsiyasi (PFA) Isroilning G‘azoga hujumlari natijasida 325 nafar futbolchi, murabbiy, hakam va boshqalar o‘ldirilganini ma’lum qildi. Tashkilot keyinchalik o‘z sahifasida UEFA prezidenti Aleksandr Cheferin nomidan bayonot joyladi. Unda Al-Ubayd “og‘ir sharoitlarga qaramay, odamlar qalbida quvonch unishi mumkinligining isboti” sifatida ta’riflangan.
“U o‘z iste’dodi va jonkuyarligi bilan G‘azo bolalariga orzular ro‘yobiga umid berdi. Uning o‘limi futbol olami va sportning odamlarni birlashtirish kuchini anglaydigan har bir inson uchun katta yo‘qotishdir”, deyiladi bayonotda
Isroilning 2023-yil 7-oktyabrda boshlangan hujumlari sabab G‘azoda 61 mingdan ortiq tinch aholi halok bo‘ldi. Xalqaro bosimga qaramay, yahudiy davlati harbiy harakatlarni to‘xtatmayapti.
Izoh (0)