Qariyb qirq yillik mojarodan so‘ng Armaniston va Ozarbayjon rahbarlari Nikol Pashinyan va Ilhom Aliyev Vashingtonda AQSH prezidenti Donald Tramp ishtirokida tinchlik dekloratsiyasini imzoladi.
Imzolagan deklaratsiyada allaqachon kelishilgan tinchlik shartnomasini imzolash va ratifikatsiya qilish jarayonini tezlashtirish zarurligi ta’kidlangan.
Ozarbayjon va Armaniston tashqi ishlar vazirlari Vashingtonda shartnomani parafladi, ya’ni kelishilgan matnni tasdiqladi.
Deklaratsiyada mintaqada aloqalarni tiklash muhimligi va Ozarbayjonning asosiy hududi bilan uning eksklavi Naxichevan o‘rtasida Armaniston hududidan, uning Eron bilan chegarasi bo‘ylab o‘tadigan transport yo‘lagini yaratish masalasi ham ko‘tarilgan.
“Bugun biz Janubiy Kavkazda tinchlik o‘rnatmoqdamiz va yangi buyuk tarixni yozmoqdamiz”, dedi Ozarbayjon prezidenti.
Armaniston bosh vaziri esa bu kelishuv “tinchlik bobini ochishi”ni bildirgan.
“Biz o‘tmishdagidan yaxshiroq tarix uchun poydevor qo‘ymoqdamiz”, deya qo‘shimcha qilgan u.
“Bu davlatlar jangovar harakatlarni butunlay to‘xtatish, savdo-sotiq, sayohat va diplomatik aloqalarni qayta tiklash, bir-birining suvereniteti va hududiy yaxlitligini hurmat qilish majburiyatini olmoqda”, dedi Tramp ikki rahbar bilan o‘tkazilgan qo‘shma matbuot anjumanida.
“Ular shuncha yillar davomida juda azob chekishdi, ko‘pchilik, jumladan Yevropa Ittifoqi, ruslar yechim topishga urinishdi, lekin natija bo‘lmadi. Ammo ushbu kelishuv tufayli biz nihoyat tinchlikka erishishga muvaffaq bo‘ldik”, deb ta’kidlagan Amerika prezidenti.
Uch tomonlama uchrashuv davomida Armaniston va Ozarbayjon “Trampning xalqaro tinchlik va farovonlik yo‘lagi” deb nomlanadigan yirik tranzit yo‘lagini barpo etishga kelishib olishgan.
U Armaniston hududi orqali Ozarbayjonni uning Bokuga ittifoqchi bo‘lgan Naxichevan mintaqasi bilan bog‘laydi.
Oq uy matbuot kotibi Anna Kellining ta’kidlashicha, yangi tranzit yo‘lagi “Armaniston va uning xalqi suvereniteti hamda hududiy yaxlitligini hurmat qilgan holda to‘siqsiz aloqani ta’minlaydi”.
Ozarbayjon va Naxichevanni Armaniston hududining 32 kilometrlik qismi ajratib turadi.
Boku uchun yo‘lak Naxichevan bilan to‘g‘ridan-to‘g‘ri quruqlik aloqasini ta’minlaydi, Turkiya bilan munosabatlarni mustahkamlaydi va infratuzilma diplomatiyasi orqali urushdan keyingi yutuqlarni mustahkamlaydi.
Izoh (0)