Namangan viloyatida qora Gentra haydovchisi piyodani urib, qochib ketgani aks etgan video tarqaldi. Holat yuzasidan viloyat YHXB ma’lumot berdi.
Unga ko‘ra, holat 11-fevral kuni soat 06:40 larda sodir bo‘ldi. Noma’lum shaxs o‘zining boshqaruvida bo‘lgan Gentra’da Namangan shahar, A.Temur ko‘chasida harakatlanib, yo‘lni kesib o‘tayotgan piyoda — Namangan shahrida yashovchi, 1958-yilda tug‘ilgan fuqaroni urib yuborib, hodisa joyidan yashiringan.
Natijada piyoda olgan tan jarohati sababli voqea joyida vafot etgan. Holat yuzasidan Namangan shahar IIB huzuridagi Tergov bo‘limi tomonidan Jinoyat kodeksining 117-moddasi 2-qismi va 266-moddasi 2-qismi bilan jinoyat ishi qo‘zg‘atilgan.
Noma’lum haydovchini topish bo‘yicha o‘tkazilayotgan tezkor qidiruv ishlari yuzasidan qora rangli Gentra’lar mutaxassislar tomonidan tekshirilib, tekshiruv yakunlangandan so‘ng ruxsat berilmoqda.
Shu sababli ijtimoiy tarmoq foydalanuvchilaridan odam o‘limiga sababchi bo‘lib, javobgarlikdan qutulmoqchi bo‘lgan haydovchini topish maqsadida o‘tkazilayotgan tezkor qidiruv ishlarini va bu boradagi ichki ishlar organlari xodimlarining sa’y-harakatlarini noto‘g‘ri talqin qilmasliklari so‘raldi.
Izoh (0)