Turkiyaning IC İçtaş İnşaat kompaniyasi O‘zbekistondagi pulli avtomobil yo‘llari qurilishida ishtirok etmoqchi. Bu haqda Iqtisodiyot va moliya vazirligi matbuot xizmati xabar berdi.
Ma’lum qilinishicha, 15-yanvar kuni kompaniya boshqaruv kengashi a’zosi Rexa Denemech hamda bosh vazir o‘rinbosari — iqtisodiyot va moliya vaziri Jamshid Qo‘chqorov o‘rtasida uchrashuv bo‘lib o‘tdi. Unda kompaniyaning IC İçtaş İnşaat qurilish biznesini rivojlantirish bo‘yicha bosh direktori Yegemen Ilkin hamda O‘zbekiston iqtisodiyot va moliya vaziri o‘rinbosari Ilhomjon Umrzakov, transport vaziri o‘rinbosari Ilhomjon Abdugafarov, Avtomobil yo‘llari qo‘mitasi raisi Jamshid Tursunov va boshqa mas’ul vakillar ishtirok etdi.
Unda tomonlar o‘rtasida DXSh dasturlari asosida transport infratuzilmasini takomillashtirish, xususan, avtomobil yo‘llarini qurish va modernizatsiya qilish masalasi ko‘rib chiqildi. Turk kompaniyasining avtomobil yo‘llari, ko‘priklar va aeroportlar qurish yo‘nalishidagi loyihalari yuzasidan muhokamalar bo‘lib o‘tdi.
Suhbat davomida Turkiya kompaniyasi yangi Samarqand—Buxoro tezyurar pulli avtomobil yo‘lini qurish maqsadida Avtomobil yo‘llari qo‘mitasi bilan anglashuv memorandumi imzoladi.
Shuningdek, tomonlar DXShni rivojlantirishning asosiy yo‘nalishlari, uning mexanizmlari hamda xorijiy tajribadan foydalanish borasida fikr almashdi. Muzokaralar yakunida belgilangan maqsadlarga erishishda tizimli faoliyat olib borishga kelishildi.
Samarqand—Buxoro pulli avtomobil yo‘li haqida
Samarqand va Buxoro o‘rtasida pullik avtomobil yo‘li qurilishi prezidentning 2024-yil 30-avgustdagi qarori bilan belgilangan. Loyiha qiymati 1 milliard dollarga baholangan. Ushbu pulli yo‘l Samarqand, Buxoro va Navoiy viloyatlaridan o‘tadi. Jarayonlarni 2027—2030-yillarda amalga oshirish rejalashtirilgan.
IC İçtaş İnşaat kompaniyasi haqida
Kompaniya 55-yillik tajriba ega bo‘lib, avtomobil yo‘llar, tunnellar, ko‘priklar hamda turli yirik inshootlarni nafaqat Turkiyada, balki xorijiy davlatlarda DXSH asosida muvaffaqiyatli barpo etgan. Kompaniya tomonidan DXSH asosida Istanbul shahrida umumiy uzunligi 150 kilometr avtomobil yo‘li, dengiz ustida 1,5 kilometr uzunlikdagi Yavuz Sulton Salim nomli bosfor ko‘prigi qurilgan, shuningdek, amalga oshirilayotgan yirik loyiha qatoriga Vyetnamda qurilayotgan yangi aeroportni kiritish mumkin.
Izoh (0)