Jizzax viloyatining Yangiobod, Toshkent viloyatining Zangiota, Qoraqalpog‘iston Respublikasining Beruniy va Toshkent shahrining Uchtepa tumanida energiya resurslaridan noqonuniy foydalanish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, “A.S.” MCHJ mas’ul shaxslari Yangiobod tumani, Mustaqillik ko‘chasidagi umumiy ovqatlanish shoxobchasida gaz tarmog‘iga gaz hisoblagichdan tashqari ulangan. Natijada jami 192,2 mln so‘mlik tabiiy gazdan noqonuniy foydalanilgan.
Shuningdek, Zangiota tumanida fuqarolar M.O. va M.X. yashash xonadonlarida past bosimli umumiy foydalanishdagi gaz quvuriga yashirincha shlang yordamida ulangan. Oqibatda jami 151,7 so‘mlik tabiiy resurslardan noqonuniy foydalanilgan.
Shu bilan birga, Beruniy tumanida fuqaro Yu.N. yashash xonadonida gaz tarmog‘iga shlang yordamida to‘g‘ridan-to‘g‘ri ulanib, jami 126,6 mln so‘mlik tabiiy gazdan noqonuniy foydalangan.
Bundan tashqari, Uchtepa tumanida fuqaro R.N. o‘ziga tegishli turar joy binosida umumiy foydalanishdagi elektr tarmog‘iga tijorat maqsadida to‘g‘ridan-to‘g‘ri ulangan. So‘ng jami 111,5 mln so‘mlik elektr energiyasidan noqonuniy foydalangan.
Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Energiya resurslaridan noqonuniy foydalanish holatlari ortib bormoqda
O‘zbekistonning turli hududlarida energiya resurslaridan noqonuniy foydalanish holatlari aniqlanmoqda. Ushbu holatlarning aksariyatida miqdor mlrd so‘mdan ortiq. Xususan, Sirdaryoda 683 mln so‘mlik “svet”dan noqonuniy foydalangan shaxs ushlangan edi.
Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi. Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Bundan tashqari, Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)