Bugun O‘zbekiston milliy teleradiokompaniyasiga qarashli bir qator telekanallar tuzilmasi va ulardagi rahbarlar tarkibi o‘zgardi.
Bu haqda “Daryo”ning MTRKdagi manbasi xabar berdi.
Unga ko‘ra, prezidentning tegishli farmoniga asosan, O‘zbekiston milliy teleradiokompaniyasi tizimidagi tashkilotlarni qayta tashkil qilish dasturi bo‘yicha telekanallar bir qator birlashmalar tarkibiga qo‘shildi.
Jumladan,
- "O‘zbekiston 24" ijodiy birlashmasi tarkibiga "O‘zbekiston 24", "O‘zbekiston", "Dunyo bo‘ylab" telekanallari va "O‘zbekiston 24" radiokanali;
- "Ma’rifat" ijodiy birlashmasi tarkibiga "Madaniyat va ma’rifat", "O‘zbekiston tarixi", "Bolajon" va "Kinoteatr" telekanallari;
- "Yoshlar" ijodiy birlashmasiga "Yoshlar", "Navo" telekanallari va "Yoshlar" radiokanali;
- "Sport" ijodiy birlashmasi tarkibiga "Sport" va "Futbol TV" telekanallari o‘tkazildi.
"O‘zbekiston24" ijodiy birlashmasiga Haydar Hasanov, "Ma’rifat" ijodiy birlashmasiga Vohid Luqmonov, "Yoshlar" ijodiy birlmashmasiga Husniddin Ergashev, "Sport" ijodiy birlashmasiga esa Zohid Karimov 3 oylik sinov muddati bilan vaqtincha direktor vazifasini bajaruvchi bo‘ldi.
Shuningdek, ijodiy birlashmalar tarkibidagi telekanallarga 3 oylik sinov muddati bilan o‘rinbosar vazifasini vaqtincha bajaruvchilar ham tayinlandi.
Jumladan, "O‘zbekiston 24" telekanaliga Shunqor Choriyev, "Madaniyat va ma’rifat" telekanaliga Orif Ahmedov, "O‘zbekiston" telekanaliga Dilshod Fayz, "Navo" telekanaliga Nasriddin Asriddinov, "O‘zbekiston tarixi" telekanaliga Alisher Shoimov, "Futbol TV" telekanaliga Darmon Ibrohimov direktor o‘rinbosari bo‘ldi.
"Mahalla" teleradiokanali esa moliyaviy mustaqil telekanal hisolangani uchun Davlat byudjeti mablag‘lari hisobidan davlat buyurtmasini bajarish sharti bilan loyihaviy moliyalashtirish tizimiga o‘tkazilgan. Mazkur telekanal direktori sifatida Ikrom Choriyev faoliyat yuritadi.
O‘tgan yilning dekabr oyida O‘zbekiston milliy teleradiokompaniyasiga 2025-yil uchun davlat byudjetidan 881 milliard so‘mdan ortiq mablag‘ ajratilgani xabar berilgandi. Bu 2023-yilga nisbatan 320 milliard so‘mga ko‘proq hisoblanadi.
Shundan 107 milliard so‘mdan ko‘proq mablag‘ futbol musobaqalarini yoritishga moslashgan ko‘chma televizion stansiyalar sotib olish uchun ajratiladi.
Izoh (0)