Башар Ассаднинг авиаҳалокатда ҳалок бўлгани эҳтимоли юқори. Бу ҳақда Суриядаги икки манбага таяниб Reuters хабар бермоқда.
Flightradar маълумотига кўра, Асад бортида бўлгани тахмин қилинаётган самолёт Россия ҳарбий-ҳаво ва денгиз базалари жойлашган Суриянинг қирғоқбўйи ҳудудлари томон йўл олган. Бироқ кейинчалик борт кескин бурилиб, пастга туша бошлаган, кейин эса 500 метр баландликда радарлардан ғойиб бўлган.
“Самолёт радардан ғойиб бўлган бўлиши мумкин, транспондер ўчирилгандир, аммо самолёт уриб туширилган бўлиши эҳтимоли катта”, деди суриялик манба.
Сурияда исёнчилар Дамашқни эгаллади
8 декабрь куни Сурияда исёнчилар Хомс шаҳрини босиб олганларидан сўнг мамлакат пойтахти Дамашққа бостириб кирганликларини эълон қилди. Сурия президенти Башар Асад оиласи билан мамлакатни тарк этгани ҳақида хабарлар тарқалди. Syrian Аir авиакомпанияси самолёти Дамашқ аэропортидан тахминан исёнчилар пойтахтни қўлга киритгани ҳақида хабар тарқалган пайтда парвоз қилган. Суриянинг хориждаги асосий мухолифат гуруҳи раҳбари Ҳоди ал-Баҳро ҳам Дамашқ энди “Башар Асадсиз” эканини таъкидлаган.
Бош вазири ҳокимиятни топширишга тайёр
Al Arabiya телеканалига кўра, Сурия бош вазири Муҳаммад Ғози ал-Жалолий Сурия халқи томонидан танланган ҳар қандай раҳбарият билан ҳамкорлик қилишга ва ҳокимиятни “топшириш” учун ҳар қандай чора кўришга тайёрлигини маълум қилган. У “Сурия давлатининг барча институтлари”ни сақлаб қолишга чақириб, давлат ишларини бошқаришни давом эттиришга тайёрлигини айтган. Сурия бош вазири Муҳаммад Ғози ал-Жалолий ўз уйидан чиқиб, қуролли шахслар ҳамроҳлигида мухолифат етакчиси билан учрашиш учун кетди.
AFP агентлиги исёнчилар етакчисига таяниб, Дамашқдаги давлат идоралари ҳокимият расман ўтказилгунга қадар бош вазир назорати остида қолишини маълум қилди.
Изоҳ (0)