Самарқанд вилояти Ургут туманидан буддавийлик ибодатхонасининг қолдиқлари топилди. Бу ҳақда Маданий мерос агентлиги ахборот хизмати хабар берди.
Айтилишича, Маданий мерос агентлиги ҳузуридаги Яҳё Ғуломов номидаги Самарқанд археология институти ходимлари томонидан Ургут туманида жойлашган Қўрғонтепа ёдгорлигида илк ўрта асрларга оид бўлган буддавийлик ибодатхонасининг қолдиқлари топилди.
Маълумотларга кўра, ушбу ибодатхона тўғри тўртбурчак шаклида бўлиб, деворларнинг сақланиб қолган баландлиги 3 метрни ташкил этади. Хона тўрида тахт мавжуд бўлиб, унинг тўрт томонида устун ўринлари жойлашган. Ибодатхонага 5 та эшик орқали кириш мумкин бўлган.
Хона деворлари диний мавзудаги суратлар билан безатилган бўлиб, сақланиб қолган тасвирлар орасида ясси юзли, қулоқ ва қўллари эса зеб-зийнатларга бой бўлган маъбуданинг тасвири туширилган. Унинг бошида илк ўрта асрлар сўғд санъатида кўп учрайдиган қанотли, устки қуббаси ярим ой шаклда бўлган тож тасвири акс этган.
Археолог олимлар томонидан хонада аниқланаётган деворий сурат парчалари орасида бундай тож ва персонаж тасвирларининг турли бўлаклари топилмоқда. Ушбу ибодатхонанинг деворларида юқорида қайд этилган маъбуда тасвири хонанинг барча бурчакларида тасвирланган.
Бундан ташқари, ибодатхона деворларида токчалар ҳам мавжуд бўлиб, улардан бирининг ичида лойдан ясалган ҳайкалнинг қўл ва оёқ қисмлари топилди. Археологларнинг қайд этишича, ибодатхона VII-VIII асрларда фаолият юритган, аммо 712 йилда Қутайба ибн Муслим бошчилигидаги арабларнинг Самарқандга қилган юришлари натижасида ёқиб юборилган бўлиши мумкин.
Ҳозирда Қўрғонтепа археологик ёдгорлигида қазув тадқиқотлари, деворий суратларни сақлаш, улардан нусха кўчириш ва ечиб олиш жараёнлари давом этмоқда. Келгусида ёдгорликни япониялик мутахассислар билан ҳамкорликда фанлараро усулларини қўллаган ҳолда ўрганиш ишларини олиб бориш режалаштирилган.
Изоҳ (0)