Қозоғистоннинг Атирау вилоятида заҳарли қорақурт ўргимчаклари оқибатида чорва моллари нобуд бўлмоқда, одамлар шифохонага ётқизилмоқда. Бу ҳақда Tengrinews хабар берди.
Маълум қилинишича, қумлоқ жойларда заҳарли ҳашаротлар сонининг кўпайиши кузатилмоқда, ҳозиргача 63 бош туя нобуд бўлган.
“Заҳарли ўргимчаклар чақиши ортидан 397 бош туя зарар кўрган, улардан 217 боши даволанган. Нобуд бўлган ва жабрланган ҳайвонлардан тестлар олиниб, ветеринария кўригига юборилган”, — деди Атирау вилояти қишлоқ хўжалиги ва ер муносабатлари бошқармаси матбуот котиби Актилек Нуроллаева.
У касалланган ва ўлган жониворлар учун компенсация тўланмаслигини айтди.
“Маҳаллий ветеринария шифокорлари даволаш учун барча чораларни кўрмоқда”, — дея қўшимча қилди у.
Мутахассислар маҳаллий чорвадорлардан заҳарли ҳашаротлар бўлиши мумкин бўлган яйловларга туя, от ва сигирларни олиб чиқмасликни, ҳайвонларда касаллик белгилари аниқланса, дарҳол хабар беришни сўраган. Ўз навбатида, отларнинг ўлими қайд этилган.
Хавфли ҳашаротлар ҳозир Индера вилоятининг Ўрлиқ, Кўктўғай, Эсбол ва Элтай қишлоқларини босиб олган. Қишлоқ аҳолиси ҳам заҳарли ўргимчак чақишидан азият чекмоқда. Бу ҳақда Индерский тумани ҳокимлиги расмий вакили Али Жайшилиқ маълум қилган.
“Биринчи ҳолат 29 май куни қайд этилган. Жами тўққиз киши, жумладан, етти нафар ёши катталар, 7 ва 15 ёшли икки мактаб ўқувчиси жабрланган. Айни пайтда қишлоқ аҳолисининг саккиз нафари стационар, бир нафари амбулатор даволанишда, бир нафари эса тиббий ёрдамдан бош тортган. Касалхоналарда заҳарли ҳашаротлар чақишини даволаш учун кўплаб дори-дармонлар мавжуд”, — дейди Али Жайшилиқ.
Изоҳ (0)