Карьерасини ўз қўли билан барбод қилган Болливуд юлдузлари

Болливуд олами худди эртак каби: ҳинд фильмларида яхшилик доимо ёвузлик устидан ғалаба қозонади, томошабин чексиз қўшиқ ва рақслар, кўз ёш ва кулгиларга бой ажойиб сюжетдан баҳраманд бўлади. Ҳиндистонда бутун дунёда эътироф этилган кўплаб актёр ва актрисалар етишиб чиққан. Аммо баъзи санъаткорлар ё адашиб, ёки нотўғри қарор қилиб, ўз карьерасини барбод қилган. Қуйида Голливуддаги мартабасини йўқотган машҳурлар ҳақида сўзлашамиз.

Мандакини

Мафтункор Мандакини серқирра ижодкорлик ва актёрлик маҳорати билан танилган машҳур актриса эди. Ўзининг 6 йил давом этган қисқа фаолияти давомида кўплаб фильмларда рол ижро этди ва ҳинд киносида ўчмас из қолдирди.

Бироқ унинг жиноят олами вакили билан тушган биргина сурати интернетда тарқалиб кетди ва шов-шувларга сабаб бўлди. Бунинг устига мафиоз эркак уйланган эди. Мандакини у билан фақат дўст эканини таъкидласа-да, унинг сўзларига ҳеч ким ишонмади. Шу кундан бошлаб актрисанинг кино саноатидаги карьераси қулай бошлади.

Шакти Капур

Шакти Капур 90 йилларда намойиш этилган кўплаб фильмларида салбий ва комедик қаҳрамонларни гавдалантирган. Унинг кино саноатидаги фаолияти 2005 йилда энг чўққисига етган эди.

Аммо ҳинд телевидениеси томонидан актёр устидан текширув операцияларни ўтказилгач, Шакти Капур кинода рол эвазига қизлардан ахлоққа зид ишларни бажаришни талаб қилгани маълум бўлди. шоу-бизнесда бўлиб ўтган катта жанжалдан сўнг актёрнинг кинодаги фаолияти бутунлай барбод бўлди.

Мамта Кулкарни

Мамта Кулкарни бир вақтлар нафақат режиссёрларнинг, балки бутун ҳинд халқининг севимли актрисаси эди У Говинда, Шоҳрух Хон, Сунил Шетти ва Салмон Хон каби машҳур актёрлар билан фильмларда суратга тушди.

Гўзал актриса аввалига очиқ кийимлари ёки фотосуратлари билан томошабинлар эътирозига сабаб бўлди. Сўнг мумбайлик гиёҳванд моддалар сотуви билан шуғулланувчи Викрам Госвами билан алоқаси фош бўлгач, Мамта Кулкарнининг карьераси жарликка қулади.

Вивек Оберой

Аишвария Рай ва Вивек Оберой “Хўш, барибир севиб қолдингми” фильмини суратга олиш жараёнида бир-бирига кўнгил қўйгани ҳеч кимга сир эмас. Уларнинг муносабатларига Аишвариянинг собиқ севгилиси Салмон Хон сабабли нуқта қўйилди.

Вивек Оберой карьерасининг якун топишига матбуот анжуманида Салмон Хоннинг унга қилган барча таҳдидли қўнғироқлари ҳақида очиқ сўзлаб бериши ва у билан жанжаллашиши сабаб бўлди. Вивек машҳур режиссёрлардан яхши роллар олмаслиги учун Салмон Хон қўлидан келган барча ишларни қилди ва бунинг уддасидан чиқди.

Маниша Койрала

Паҳади қабиласининг гўзал фарзанди ва Непалнинг 22-Бош вазири Бисвешвар Прасад Коираланинг набираси Маниша нуфузли оилада таваллуд топди. Унинг гўзаллиги ва актёрлик маҳорати Болливудда бир зумда муваффақият қозонишига сабаб бўлди. Афсуски, “Бир қарашда севги”, “Бомбей” каби катта фильмларда иштирок этганига қарамай, спиртли ичимликларга ружу қўйгани туфайли Маниша кино саноатидан ғойиб бўлди.

Фардин Хон

Ҳиндистонлик кинорежиссёр ўғли Фардин Хон бир вақтлар томошабинларнинг энг севимли ва келишган актёрларидан бири эди. У “Кириш ман этилади”, “Ангара клубининг бошлиғи”, “Мураббий” каби фильмларда Ом Пури, Амитабх Баччан ва Карина Капур каби Болливуд юлдузлари билан ажойиб образларни гавдалантирган.

Бироқ 2001 йил май ойида Фардин Хон ва унга наркотик моддалар сотган дилер Насиомр Шайх полиция томонидан ҳибсга олинди. Ҳуқуқ-тартибот идоралари актёрда 9 грамм гиёҳвандлик моддаси бўлганини даъво қилишди. Шу каби хабарлар ва гиёҳванд моддаларга ружу қўйиши сабабли Фардин Хон киноларда чиқишни тўхтатди.