Ливандаги “Ҳизбуллоҳ” гуруҳи Исроил ҳарбий марказини вайрон қилди — The Defence Post

Ливандаги “Ҳизбуллоҳ” гуруҳи Исроил шимолидаги ҳарбий марказга ҳужум уюштирган. Бу ҳақда The Defence Post манбаси хабар берди.

Манбага кўра, ҳужум оқибатида Исроилнинг 14 нафар аскари яраланган. Чегараолди ҳарбий иншоотларига жиддий шикаст етказилган.

Бир қанча араб нашрлари ҳарбий марказга яқин аҳоли пунктларидан фуқаролар эвакуация қилинганини ёзган. Исроил расмий манбалари эса хабарларга ойдинлик киритмаган.

Сўнгги бир неча кун ичида “Ҳизбуллоҳ”нинг Исроил шимолига ҳужумлари фаоллашгани хабар қилинган. Гуруҳ ҳарбий дронлар ва ракеталар воситасида Тель-Авив режимининг тобора ичкари ҳудудларига зарба бермоқда.

“Ҳизбуллоҳ” расмийлари маълум қилишича, гуруҳ томонидан уюштирилган ҳужум Исроил шимолидаги Араб ал-Арамше ҳарбий марказини вайрон қилган. Бунга жавобан Исроил Ливан шарқидаги нишонларга зарба берган.

Шунингдек, Исроил қирувчи самолётлари “Ҳизбуллоҳ”нинг Баалбек ҳудудидаги ҳаво мудофааси иншоотларига ҳам зарба берган. Дронлар ҳужуми ҳам қайд этилган.

“Ҳизбуллоҳ” ҳужумида яраланган 14 аскарнинг 6 нафари оғир аҳволда экани маълум қилинган. Жароҳатланганлар зудлик билан ҳарбий касалхонага жойлаштирилган.

Маълумотларга кўра, Исроил ва Ливан кескинлиги бошлангандан бери Ливанда камида 368 киши ҳалок бўлган. Улардан 70 нафари тинч аҳоли вакиллари бўлган.

Исроилда ҳарбий ҳаракатлар бошланганидан бери шимолий чегара яқинида 10 нафар аскар ҳалок бўлган. Жами саккиз нафар тинч аҳоли вакиллари қурбон бўлгани айтилган.