Исроил ҳарбийлари ҲАМАСнинг жанговар қаноти етакчиларидан бири Марван Иссани ўлдирди. Бу ҳақда Оқ уйнинг миллий хавфсизлик бўйича маслаҳатчиси Жейк Салливанга таяниб, BBC хабар берди.
Исроил аввалроқ Исса Ғазо секторидаги зарба нишони бўлганини даъво қилган, бироқ унинг ўлимини тасдиқламаганди.
“ҲАМАС иeрархиясидаги учинчи одам бўлган Марван Исса ўтган ҳафта Исроил операциясида ўлдирилган. Қолган юқори мартабали раҳбарлар, эҳтимол, ҲАМАС туннеллари тармоғида яширингандир, аммо адолат уларга ҳам келади”, — деди Салливан.
Шунингдек, у АҚШ президенти Жо Байден Исроил бош вазири Биньямин Нетаньяху билан телефон орқали мулоқот қилганини айтди. ҲАМАС расмийлари Иссанинг ўлими ҳақидаги хабарларга изоҳ бермади.
11 март куни Исроил ҳарбийлари Ғазо марказидаги Нусейрат қочқинлар лагери яқинидаги ерости мажмуасига ҳаво ҳужуми уюштиргани, Исса нишонга олинганини маълум қилди ва уни 7 октябрда Исроилга уюштирилган ҳужум ташкилотчиларидан бири деб атади. Исса ҲАМАСнинг ҳарбийлаштирилган қаноти Ал-Қассам бригадаларини бошқарадиган Муҳаммад Дейфнинг ўринбосари эди.
Исроил армийси расмийси Даниэль Ҳагарининг айтишича, ўшанда Исса операцияда ўлдирилганми ёки йўқми, аниқ эмас:
“Биз зарба оқибатларини ўрганяпмиз ва якуний тасдиқ ҳали олинмаган”, — деган эди у.
Нетаньяху билан суҳбатида Байден Исроилни қўллаб-қувватлашга содиқлигини яна бир бор тасдиқлади, аммо уруш пайтида миллионга яқин қочқинлар кўчиб ўтган Рафаҳга исроиллик ҳарбийларнинг бостириб кириши хато бўлишини айтди.
“Бу янада кўпроқ бегуноҳ фуқароларнинг ўлимига олиб келади, гуманитар инқирозни янада ёмонлаштиради, Ғазода анархияни кучайтиради ва Исроилни халқаро миқёсда изоляция қилади”, — деган Салливан.
Шунингдек, Байден Нетаньяхуга Ғазода “аниқ стратегик мақсад” қўйиш зарурлиги ҳақида айтган.
“Президент бугун бош вазирга яна бир бор таъкидладики, биз ҲАМАСни енгиш борасида шерикмиз, аммо бунинг учун изчил ва барқарор стратегия керак, деб ҳисоблаймиз”, — дея қўшимча қилди Салливан.
Изоҳ (0)