Миллиардер Илон Маск гиёҳвандликка ружу қўйган, Tesla ва SpaceX директорлар кенгаши бундан хавотирда. Бу ҳақда Wаll Street Journal хабар берди.
Хабарга кўра, миллиардер турли мамлакатлардаги ёпиқ тадбирларда гиёҳванд моддалардан фойдаланади. 2018 ва 2021 йиллар оралиғида Илон Маск бир нечта зиёфатларда қатнашган, унда иштирокчилар смартфонларни топширган ва махфийлик бўйича ҳужжат имзолаган. Шу тариқа Маск Лос-Анжелесдаги бундай зиёфатда LSD, Мексикада — галлюциноген қўзиқоринлар ва Майамида кетамин истеъмол қилгани айтилмоқда.
Миллиардернинг атрофидаги одамлар тадбиркор ҳали ҳам гиёҳванд моддаларни истеъмол қилишини таъкидламоқда. Кўпинча, у кетамин қабул қилади, Маскнинг тиббий рецепти бор. Унинг доиралари эса бундан хавотирда, чунки улар тақиқланган дорилар миллиардернинг ўзига ва бизнесига зарар етказиши мумкин, деб ҳисоблайди.
Айни пайтда олтита компания, кўп миллиард долларлик инвесторлар активлари, ўн минглаб иш ўринлари ва Америка космик дастурининг бир қисми Маскнинг ҳолатига боғлиқ.
Шу билан бирга, гиёҳванд моддаларни ноқонуний истеъмол қилиш Маск компаниялари сиёсатига зиддир ва 14 миллиард долларлик давлат шартномаларига, бизнесменнинг обрўси ва мавқейига хавф туғдириши мумкин. Миллиардернинг атрофидагилар унинг тез-тез жаҳлдор ва беқарор хатти-ҳаракатларини намоён этишига одатланган. Бироқ сўнгги бир неча йил ичида вазият ёмонлашди.
“Маск баъзи нутқларида ўзини ғалати тутган, бемаъни гапирган ва номақбул ҳазиллар қилган”, — дейилади хабарда.
2018 йилда тадбиркор Жо Роганнинг подкастида марихуана чеккан ва бу Tesla акцияларининг тушишига олиб келган. Шундан сўнг НАSA SpaceX’дан гиёҳванд моддаларсиз ишлаш қонунига риоя қилиш бўйича ёзма кафолатлар талаб қилган. Бошқа шубҳали эпизодлар ҳам бўлган, аммо ҳозиргача инвесторлар бунга кўз юмган.
Изоҳ (0)