3 ноябрь куни Фаластин ҳукумати Исроил минглаб фаластинлик ишчиларни қамал остидаги Ғазога қайтариб юборганини маълум қилди.
Ғазодан борган 18 мингга яқин фаластинлик ишчиларга Исроилда “қора ишлар”ни қилишга рухсат берилганди. Ишсизлик даражаси 50 фоизга яқин Ғазо секторидан борганлар учун рухсатнома талаб қилинади. Исроил сўнгги йилларда рухсатнома беришни бошлади, бу чора Ғазони барқарорлаштириш ва ҲАМАСни юмшатишга ёрдам бериши кутилган.
2 ноябрь куни кечқурун Исроил ишчиларнинг рухсатномаларини бекор қилиш ва уларни депортация қилишини билдирди.
Эртаси куни уйларига жўнатилган ишчилар Исроил қамоқхоналаридаги оммавий рейд ва ҳибслар ҳақида гапириб берди. Баъзилар Исроил расмийларининг нотўғри муносабати туфайли кўкаришлар ва бошқа жароҳатлар билан, бошқалар руҳий шикастланган ҳолда қайтишди, деб ёзади AP.
Камида бир киши, 61 ёшли Мансур Варш оға тобутда келтирилди.
Ҳибсга олинган ишчилар Ғарбий Соҳилдаги Анатот ва Офер ҳарбий қамоқхоналарига юборилган. У ерда ишчилар кўзлари боғлангани, сўроққа тутилгани, қайта-қайта калтаклангани, узоқ вақт давомида сув ва овқатдан маҳрум этилганини айтиб беришди.
Исроилдаги инсон ҳуқуқлари ташкилотлари мамлакат фаластинлик ишчиларни ҳеч қандай айбловларсиз ва қонуний вакилликсиз ҳибсга олганини айтмоқда.
Депортация қилинган 10 000 га яқин фаластинлик жума куни Ғазога қайтиб келди, деди анклав чегара пунктлари матбуот котиби Ваэл Абу Умар.
Изоҳ (0)