Тармоқларда Тошкент вилоятининг Чирчиқ шаҳрида қурилиш компанияси томонидан қуриб битказилган ва ҳали топширилганига бир йил ҳам бўлмаган кўп қаватли уй чўкиб, ёнбошлаб қолгани айтилган видео тарқалди. Қурилиш ва уй-жой коммунал хўжалиги вазирлиги ҳолат ўрганилаётганини, ўрганиш натижалари маълум қилинишини билдирди.
Чирчиқ шаҳар ҳокимлиги ахборот хизматининг “Дарё”га билдиришича, мазкур уй 9 қаватли.
Facebook фойдаланувчиси уй ҳақида хабар берар экан, Golden House компанияси томонидан қурилган кўп қаватли уй, бир йил ўтмасдан ёнбошлаб қолибди. Уйда аҳоли яшамоқда. Мутасаддилар, мутахассисларни чақириб текшириб қўйинг! Бизнинг қурувчилар билан айтиб бўлмайди-да. Ёхуд шунда ҳам чуқурлашмайликми, уйда яшовчиларнинг ўзи уйни қийшаймай яшатиши керакми?”, — дея ҳолатга муносабат билдиради.
Мазкур хабарга муносабат билдирган Қурилиш ва уй-жой коммунал хўжалиги вазирлиги ҳолат назоратга олинганини билдирди.
Тошкент вилоятининг Чирчиқ шаҳри “Ифтихор” МФЙ ҳудудида қурилиб, фойдаланишга топширилган мазкур кўп қаватли уйда юзага келган ҳолат ҳозирда Қурилиш ва уй-жой коммунал хўжалиги вазирлигининг қурилиш лойиҳа ташкилотлари мутахассислари, қурилиш соҳасида ҳудудий назорат инспекцияси масъуллари томонидан назоратга олинган. Ўрганиш натижалари бўйича батафсил маълумот тақдим қилинади, — дейилади вазирлик муносабатида.
Изоҳ (0)