Ижтимоий соҳани доимо қўллаб-қувватлаб келган "Олмалиқ КМК" АЖ ҳомийлик маблағлари ҳисобидан жорий йилнинг апрель ойида Паркент тумани, Қизилтоғ шаҳарчаси, "Файзобод" маҳалласида жойлашган "Чотқол" маданият маркази биносини мукаммал таъмирлаш ишлари бошланган эди.
Қисқа муддатда ушбу бино замонавий қиёфага келтирилиб, жорий йилнинг 23 сентябр куни маданият маркази биносининг тантанали очилиш маросими бўлиб ўтди.
Тадбирда Ўзбекистон Республикаси маданият вазири Озодбек Назарбеков, Тошкент вилояти ҳокими Зойир Мирзаев, ОКМК бошқаруви раиси, сенатор Абдулла Хурсанов, Ўзбекистон халқ артисти Ёдгор Саъдиев ва жамоатчилик вакиллари иштирок этишди.
Тадбирда сўз олган масъуллар юртимизда олиб борилаётган ислоҳотлар замирида инсон манфаатлари мужассам эканлигини, ушбу маданият маркази ҳам ҳудуд аҳолисига хизмат қилишини таъкидлашди.
Тадбир давомида марказ қурилиш ишларида фаол бўлган бир гуруҳ қурувчи ва мутасаддилар қимматбаҳо совғалар билан рағбатлантирилди.
Тадбирда рамзий калит маданият маркази раҳбарига топширилди ва маскан расман фойдаланишга топширилди.
Бинонинг ҳовлисига ажойиб фаввора ўрнатилиб, том қисмидаги шиферлар профнастилга алмаштирилган. Фасад қисми ва хоналар сувоқдан чиқарилиб, пардоз ишлари амалга оширилган. Эски турдаги ойналар ўрнига пластик ромли ойналар ўрнатилиб, иситиш тизими ҳам тўлиқ янгиланган. Бинонинг тунги ёритиш тизими иқтисодий тежамкор чироқлар билан жиҳозланди.
Маданият саройида 1 та катта томошалар зали бўлиб, у 350 ўринга мўлжалланган. Шунингдек, 4000 дона бадиий адабиётларга эга замонавий кутубхона, бадиий тўгараклар учун хоналар мавжуд.
Маданият маскани мусиқа асбоблари, мусиқий марказлар ҳамда кўчма саҳналар билан ҳам таъминланди.
Иккинчи қават эса ҳи теч усулида безатилди.
Мазкур бинонинг таъмирлаш ишлари ва жиҳозлашга жами бўлиб 12 млрд сўмлик маблағ сарфланди.
Тадбир иштирокчиларига вилоят маданият соҳаси вакиллари ва “Металлург”маданият саройи ижодкорлари ҳамда санъаткорлар томонидан тайёрланган концерт дастури манзур бўлди.
Эндиликда 1000 нафарга яқин ўғил-қизлар 10 та турли хил тўгаракларда шуғулланиш имконига эга бўлишди.
Бир сўз билан айтганда, “Чотқол” маданият саройи Паркентликларга комбинатнинг ўзига хос совғаси бўлди.
Реклама ҳуқуқи асосида.