Мексика ҳукумати қамоқдаги наркобарон Хоакин Гузман (Эл Чапо номи билан машур)нинг ўғли Овидио Гузманни АҚШ ҳуқуқ-тартибот идораларига расман топширди. Бу ҳақда Reuters хабар берди.
“Қамоқдаги мексикалик наркобарон Эл Чапо Гузманнинг ўғли Овидио Гузман фентанил савдосида гумон қилинаётгани учун жума куни (15 сентябрь) АҚШга экстрадиция қилинди”, — дейилади хабарда.
АҚШ бош прокурори Мерик Гарланднинг айтишича, кичик Гузманнинг экстрадиция қилиниши “Американинг Гузманлар оиласига алоқадор Синалоа картели контрабанда операцияларини бостиришга қаратилган саъй-ҳаракатларидаги сўнгги қадамдир”.
Мексика хавфсизлик кучлари Овидио Гузманни январь ойида шимолий Синалоа штатидаги Кулиакан шаҳрида қаттиқ отишмадан сўнг ҳибсга олганди. Шаҳарда узоқ йиллардан бери Эл Чапонинг наркотик империяси фаолият юритади. Ҳибсга олишдан кейин бошланган тартибсизликларда ўнлаб одамлар ҳалок бўлган.
Синалоа наркокартелининг раҳбари бўлган Эл Чапонинг ўзи 2017 йилда АҚШга экстрадиция қилинган. У Колорадодаги қаттиқ режимли Супермах қамоқхонасида умрбод қамоқ жазосини ўтамоқда.
Изоҳ (0)