АҚШ Давлат департаменти вакили Метью Миллер Россия ва Украина президентларининг ушрашиш эҳтимолини баҳолади.
Миллерга кўра, Владимир Путин билан учрашиш қарорини Владимир Зеленскийнинг ўзи қабул қилади. Бироқ Кремлнинг “императорлик амбициялари” бунга тўсиқ бўлиб қолмоқда.
“Зеленский ва Путин ўртасидаги ҳар қандай учрашувга келсак, бу қарорни Украина президентининг ўзи қабул қилиши керак. Биз Украина келажаги ҳақида гап кетганда бу жараённи айнан Киев бошқараётганини очиқ айтдик ва бу ҳар қандай потенсиал музокараларга тааллуқлидир”, — деди Миллер.
У Киев босқиндан олдин ҳам Москва билан ҳақиқий музокараларга тайёрлигини бир неча бор намойиш этганини эслатди.
“Аммо тўсиқ ҳар доим Путиннинг империалистик мақсадларидан воз кечмагани, Украина ҳақиқий давлат эмаслигини иддао қилаётгани билан боғлиқ. Шунингдек, Россия президенти ўз қўшинларини Украина ҳудудидан олиб чиқиш ниятида эмас”, — деди Давлат департаменти вакили.
Зеленский ва Путин учрашиши мумкин
Аввалроқ БАА президенти Муҳаммад бин Зайд ал-Наҳаён Украина ва Россия президентлари ўртасида учрашув ташкил этишни режалаштираётгани айтилганди. АҚШ президенти ҳам бундан хабардор экани маълум қилинган.
Учрашув Дубайда БМТнинг иқлим бўйича COP28 конференциясидан олдин ташкиллаштирилиши режалаштирилган. COP28 конференцияси 30 ноябрдан 12 декабрга қадар бўлиб ўтади.
Украина давлат раҳбарлари учрашувини баҳолади
Украина ташқи ишлар вазири Дмитрий Кулеба Украина томони Путинга ишонмаслиги, шу сабаб унинг иштирокидаги музокараларга рози эмаслигини айтди.
Муқобил вариант сифатида Кулеба Россия—Украина можаросини тугатиш бўйича музокараларда учинчи томон иштирок этиши мумкинлигини таъкидлади.
“Йўқ. Путин бизнинг ҳамкоримиз эмас. Ишни билвосита олиб боришнинг бошқа дипломатик усуллари ҳам бор. Аммо биз Путин ва Зеленскийни ҳеч қачон бир столда кўра олмаслигимиз аниқ”, — деди у.
Изоҳ (0)