“Дарё” ташкил қилган дебатда Экология давлат қўмитаси вакили иштирок этишдан бош тортди

“Дарё”нинг “Шахсий фикр” рукни остидаги дебатда Экология давлат қўмитаси ва шаҳар бошқармаси вакиллари иштирок этишдан бош тортди.

7 июнь куни янги дебат бўлиб ўтиши керак эди, унда оппонентлар сифатида “Ecolog.uz” асосчиси ва бош муҳаррири Наргис Қосимова ҳамда Тошкент шаҳар экология ва атроф-муҳитни муҳофаза қилиш бошқармасининг ташкилот раҳбарияти томонидан танланган вакили иштирок этиши керак эди. 

“Шахсий фикр” дастурини ташкил қилишда “Дарё” мухбири узоқ вақт давомида Экология қўмитасининг матбуот хизмати ёки бошқа вакили билан боғланишга уринди, аммо ҳеч қандай натижа бўлмади – фақат “Ишонч телефони” операторлари жавоб берди, улар ҳам “ҳеч қандай ёрдам бера олмасликларини” маълум қилишди.

“Дарё” таҳририяти расмий сўров юбориши хабар қилинганида операторлар Тошкент шаҳар Экология бошқармасининг телефон рақамини беришди. Бошқармада бизга ижобий жавоб беришди ва ҳатто дастур учун потенсиал иштирокчини ҳам ажратишди, аммо тасвирга олиш бошланишидан 15 дақиқа олдин у шошилинч йиғилиш баҳонасида дастурда иштирок этишдан бош тортди ва шу билан бутун таҳририятнинг режаларини пучга чиқарди. Белгиланган ходим қўнғироқларга умуман жавоб бермади.

“Дарё” Тошкент шаҳар ва Ўзбекистон Республикаси ҳукуматининг барча ваколатли органларидан юқорида тилга олинган бошқармалар ва уларнинг оммавий ахборот воситаларига муносабатига эътибор қаратишларини сўрайди, чунки улар журналистларнинг касбий фаолиятига нисбатан ҳурматсизликни яққол кўрсатиб, мамлакатимиздаги давлат органларининг очиқлик сиёсатини шубҳа остига қўймоқда.