Фарғона вилояти Қўштепа туманида мактаб битирувчиси Катта Фарғона каналида чўкиб кетгани ҳақида хабар берилган эди. Вилоят ФВБнинг маълум қилишича, боланинг жасади топилди.
Унга кўра, фуқаронинг жасади 3 июнь куни соат 18:20 да Фавқулодда вазиятлар бошқармаси Махсус вазифаларни бажарувчи минтақавий қутқарув отряди ғаввос-қутқарувчилари томонидан Олтиариқ тумани Тинчлик шаҳарчасидан оқиб ўтивчи жанубий катта Фарғона каналидан топилди.
Воқеа 25 май куни содир бўлган эди. 25 май, куннинг иккинчи ярмида Қўштепа туманидаги мактабларнинг бирининг битирувчилари “Пахтакор” маҳалласи ҳудудидан оқиб ўтадиган Катта Фарғона каналига чўмилиш мақсадида борган. Улардан бири эса чўмилиш вақтида сувдан қайтиб чиқмаган. 9 кун давомида ФВБ ходимлари томонидан қидирув ишлари амалга оширилди ва унинг жасади 3 июнь куни топилди.
Ўзбекистонда чўкиб кетиш ҳолатлари
Ўзбекистонда 2022 йил ёз мавсумида 142 нафар фуқаро чўкиш билан боғлиқ вазият туфайли вафот этган. Бахтсиз ҳодисалар 51 ҳолатда чўмилиш тақиқланган, рухсат этилмаган, чўмилиш учун шароит бўлмаган, хавфли сув ҳавзаларида чўмилганлик оқибатида, 85 ҳолатда эса эҳтиётсизлик сабаб юзага келган.
Ушбу чўкканларнинг 45,3 фоизи вояга етмаганлар ҳисобига тўғри келади. Эҳтиётсизлик оқибатида юзага келган 85 кишининг чўкиши дарёлар, каналлар ҳамда ариқларнинг устидаги сув, газ, чиқинди оқова сув қувурларидан йўлни қисқартириш мақсадида кўприк сифатида фойдаланиб ўтишлари ҳамда сув ҳавзалари қирғоқ бўйларида хавфсизлик қоидаларига риоя этмагани сабабли юз берган.
Ҳолат юзасидан ҳозирда терговга қадар текширув ҳаракатлари давом эттирилмоқда, натижаси юзасидан қонуний қарор қабул қилиниши таъминланади.
Изоҳ (0)