2022 йилда 60 мингдан ортиқ чет элликлар Ўзбекистон банкларида ҳисобварақалар очган. Бу ҳақда Сенатнинг 41-ялпи мажлисида Марказий банк бошқаруви раиси Мамаризо Нурмуратов маълум қилди.
Йиғилишда сенаторлар ўтган йили хорижий валютадаги депозитлар ҳажми 9 фоизга ошганига эътибор қаратди. Регулятор раҳбари буни хориж фуқаролари очган ҳисоб рақамлари ошгани билан изоҳлади.
Ўтган йили дунёдаги геосиёсий вазият туфайли норезидент банк ҳисоб рақамлари сони 60 мингдан ошди, улар бизнинг банкларимизга қарийб 892 миллион доллар депозит қўйган. Норезидентлар томонидан омонатларни жойлаштиришнинг кескин ўсиши — қарийб 9,5 баробар, ўз навбатида, талаб қилиб олингунча муддатга хорижий валютадаги депозитлар ошишига олиб келди, — деди Нурмуратов.
Умуман олганда, 2023 йил 1 январь ҳолатига кўра, банклар томонидан 216,7 триллион сўм (тахминан 19 миллиард доллар) омонат жалб қилинган бўлиб, шундан 92,5 триллион сўми (тахминан 8 миллиард доллар) талаб қилиб олинган омонат.
Шунингдек, ҳисобот йилида аҳоли омонатлари қолдиғи 1,7 баробарга ошиб, 63 трлн сўмга етгани қайд қилинган.
Аввалроқ банкларда омонат очишда нималарга эътибор бериш кераклиги ҳақида хабар берилганди.
Изоҳ (0)