Мактабга бориш учун Сирдарёни қайиқда сузиб ўтадиган қиз 2022 йил охириларида кўплаб муҳокамаларга сабаб бўлганди. Эндиликда у янги ўқув йилидан бошлаб Гулистон Олимпия ва паралимпия спорт турларига тайёрлаш марказида академик эшкак эшиш йўналишида ўқишни давом эттирадиган бўлди.
Ижтимоий тармоқларда асли бекободлик бўлган қизалоқ — Замира Тўйчиева ҳақида хабар тарқалгач, вилоят ҳокими вазифасини бажарувчи Акмалжон Маҳмудалиев у ўқиётган мактабга бориб, унга ноутбук ва китоблар совға қилган, онаси билан суҳбати чоғида қизининг пухта билим олиши учун барча ёрдамни кўрсатишини айтганди.
Ҳокимлик матбуот хизматининг маълум қилишича, энди қиз дарё кечиб мактабга бормайди. Вилоят ҳокими таклифига кўра, Замира Тўйчиева янги ўқув йилидан бошлаб Гулистон Олимпия ва паралимпия спорт турларига тайёрлаш марказида академик эшкак эшиш йўналишида ўқишни давом эттирадиган бўлди.
Марказда ётоқхона ва 4 маҳал бепул овқат билан таъминланади. Шунингдек, бўш вақтларида унга “Ёшлар маркази”да дастурлаш ҳамда IT-соҳасини ўрганиши учун шароит яратиб берилади.
Изоҳ (0)