Шарқий Европа ва Марказий Осиё давлатлари бўйича Чехия савдо-саноат палатасида Ўзбекистон Фармацевтика тармоғини ривожлантириш агентлиги ҳамда Dr. Muller Pharma компанияси вакиллари ўртасида музокаралар ўтказилди. Бу ҳақда “Дунё” агентлиги хабар берди.
Dr. Muller Pharma дори воситалари, тиббиёт товарлари, биологик актив қўшимчалар ва косметика ишлаб чиқаришга ихтисослашган. Европа, Африка ва Осиёнинг 40 дан ортиқ давлатларига ўз маҳсулотларини экспорт қилиб келади.
Компания вакиллари Андреа Вериш ва Ирина Филипи музокаралар давомида Ўзбекистондаги кичик бизнес ва хусусий тадбиркорлик ривожини, жумладан, фармацевтика соҳасини ривожлантириш борасида амалга оширилаётган ислоҳотларни юқори баҳолади ҳамда фармацевтика саноатида қўшма лойиҳаларни амалга оширишдан манфаатдорликни қайд этди.
Музокаралар якунлари бўйича Чехия томони Ўзбекистон Фармацевтика саноатини ривожлантириш агентлиги билан яқин ва узоқ муддатли ҳамкорликни йўлга қўйишга, хусусан, дори-дармон ва косметика маҳсулотларини тайёрлаш учун хом ашё етказиб беришга тайёрлигини билдирган.
Май бошларида Ўзбекистон дорихоналарида сотилган дори воситалари ва тиббий буюмлар учун белгиланган устамалардан юқори маблағ олингани аниқланса, ортиқча пулни истеъмолчига қайтариш тизими ишга туширилаётгани тўғрисида хабар берилганди.