Украинадаги Россия қўмондонлари сўнгги пайтларда ҳарбийларни тартиб-интизомни бузгани учун жазолай бошлади. Бу ҳақда Буюк Британия Мудофаа вазирлиги разведка маълумотларига таяниб хабар берди.
Разведка маълумотига кўра, интизомни бузган Россия кучлари ерга қазилган ва тепаси панжара билан ёпилган зиндонларга ташланмоқда. Аксар ҳолларда спиртли ичимликлар истеъмол қилган ва шартномани бекор қилишга уринган рус ҳарбийларига нисбатан шундай жазо қўлланилмоқда.
Ҳисоботга кўра, урушнинг дастлабки ойларида айбдор ҳарбий хизматчилар енгилроқ жазоланган, хизматни давом эттиришдан бош тортганларга эса уйларига эсон-омон қайтишга рухсат берилган. Куздан бошлаб эса армияда интизомни сақлаш бўйича “борган сари кескин чоралар” жорий этила бошланган.
Британия Мудофаа вазирлиги бу тенденция Бош штаб бошлиғи Валерий Герасимов Украинадаги рус гуруҳига раҳбарлик қилишни бошлаганидан кейин кучайганини айтмоқда. Зиндонлар Чеченистондаги урушлар пайтида кенг тарқалганди, жазолашнинг бу усули ҳам федерал қўшинлар, ҳам сепаратистлар томонидан ишлатилган. Жангарилар гаровдагиларни ҳам шундай зиндонларда сақлаган.
Изоҳ (0)