Трамп АҚШ учун асосий хавф нималигини айтди

АҚШнинг собиқ президенти Дональд Трамп 25 март куни Техасда бўлиб ўтган митингда АҚШ банан республикасига айланганини айтди.

Унинг сўзларига кўра, мамлакат учун асосий хавф Хитой ёки Россия эмас, балки мамлакат ҳукуматида ишлаётган юқори мартабали амалдорлар ҳисобланади. У, шунингдек, Америка чегараларини ҳимоя қилиш, овоз бериш тизими ва ҳуқуқ-тартибот идораларини сиёсий қуролга айлантиришни долзарб муаммолар деб атади.

“Агар биз 2024 йилги сайловларда ғалаба қозона олмасак, мамлакатимиз ҳалокатга маҳкумдир”, — дея таъкидлади у.

Маълумот учун, банан республикаси — халқаро сиёсатда беқарор, иқтисодий жиҳатдан эса бир ёки бир нечта қишлоқ хўжалиги маҳсулотларини ишлаб чиқариш ва экспорт қилишга қарам бўлган, кўпинча коррупция чуқур илдиз отган ва кичик элита томонидан бошқариладиган давлатлар учун ҳақоратомуз маънода қўлланиладиган сиёсий атама ҳисобланади.