Ўртоқлик ўйини. Ўзбекистон терма жамоаси Шомуродовнинг голи эвазига Боливияни мағлуб этди

Футбол бўйича Ўзбекистон миллий терма жамоаси 24 март, жума куни Боливияга қарши ўртоқлик ўйинида иштирок этди.

Саудия Арабистонида ўтказилган учрашув ўзбекистонлик футболчиларнинг фаол ҳаракатлари билан бошланди. 36-дақиқада Элдор Шомуродов жамоасининг тезкор қарши ҳужумидан кейин юзага келган вазиятни голга айлантирди.

Иккинчи бўлимда ҳам Ўзбекистон вакилларида қатор голга тортадиган вазиятлар бўлди, бироқ ҳисоб ўйин якунига қадар ўзгармай қолди. Учрашув якунланиши арафасида Хосе Сегредо дарвозабон билан бирга-бир вазиятга чиқиб бораётган Азиз Турғунбоевни тўхтатиб қолгани учун тўғридан тўғри қизил карточкага лойиқ кўрилди.

Сречко Катанец шогирдлари кейинги ўртоқлик ўйинини 28 март куни Венесуэлага қарши ўтказади.

Ўртоқлик ўйини

24 март, жума

Ўзбекистон — Боливия 1:0

Гол: 1:0 – 36 Шомуродов.

Ўзбекистон: Ўткир Юсупов, Умар Эшмуродов, Ҳожиакбар Алижонов, Рустам Ашурматов, Ҳусниддин Алиқулов, Шерзод Насруллаев (Иброҳимхалил Йўлдошев, 59), Отабек Шукуров, Одил Ҳамробеков, Жалолиддин Машарипов (Остон Ўрунов, 79), Жасур Яхшибоев (Азиз Турғунбоев, 59), Элдор Шомуродов (Сардор Собирхўжаев, 90),.

Боливия: Карлос Лампе, Диего Медина, Адриан Хусино, Дэнни Бехарано, Мигел Терсерос, Морено, Хайме Арраскаита, Роберто Фернандес, Лучано Урсино, Жейсон Чура, Леонардо Забала (Хосе Сегредо, 27).

Огоҳлантиришлар: Урсино (33), Машарипов (45), Йўлдошев (85), Шукуров (90+6).

Четлатиш: Сегредо (90+5).