Грузиянинг ҳибсдаги собиқ президенти Михаил Саакашвили бир неча ойдан бери даволанаётган клиника раҳбарияти бундан буён сиёсатчининг у ерда қолиши мақсадга мувофиқ эмас, деб ҳисобламоқда.
“Новости Грузия” хабарига кўра, тиббиёт муассасаси ушбу масала билан мамлакат пенитенциария хизматига мурожаат қилмоқчи. Тиббиёт муассасаси раҳбарияти Саакашвили фақат симптоматик даволанишга рози эканини, уни исталган муассаса олиши мумкинлигини айтди. Шунингдек, сиёсатчининг клиника ходимларига ишончсизлик билдираётгани қайд этилди.
“2022 йил октябрь ойидан бери бемор белгиланган даволаш курсидан бош тортиб келмоқда”, — деб тушунтирди клиника раҳбарияти ва бундай вазият туфайли “обрўсидан айрилишни” истамаслигини қўшимча қилди.
Саакашвилининг адвокати клиниканинг ниятини изоҳлар экан, агар Саакашвили қамоққа қайтса, бу “ўлим жазоси” бўлишини айтди.
Саакашвилининг аҳволи
Ҳозирда Саакашвилининг аҳволи оғир. Қариндошларининг айтишича, у жуда озиб кетган, организм овқатни қабул қилмаяпти. Саакашвилининг ўзи ва оиласи унинг хорижда даволанишини талаб қилмоқда. Грузия расмийлари бунга рози эмас.
Мухолифатдаги “Мтавари” телеканали Саакашвилининг оиласи полшалик шифокорлар уни келиб кўришига умид қилаётгани ҳақида хабар берганди. Европа Иттифоқидаги дипломатик манбалар Тбилиси бунга рози бўлгани ҳақида норасмий маълумот берган, бироқ ташриф санаси аниқ эмас.
Изоҳ (0)