“Манчестер Юнайтед” клубни сотиб олишни истаганлардан якуний аризаларни қабул қилади. Асосий даъвогар қатарлик инвесторлар
“Манчестер Юнайтед” эгалари клубни сотиб олишга қизиқиш билдираётганлар учун якуний таклифни тақдим этишлари учун дедлайн белгилади, дея хабар қилмоқда BBC.
Қайд этилишича, Глейзерлар 22 март куни охиригача таклифларни қабул қилади. Бироқ бу муддатнинг нақадар “қатъий” экани номаълум, янги инвесторлар чиқиб қолиши эҳтимолини инобатга олган ҳолда мазкур шарт ҳеч қандай аҳамият касб этмаслиги мумкин.
Айни вақтда клубга икки харидор бор: қатарлик шайх Жассим ибн Ҳамад ат-Тани ва британиялик миллиардер Жим Ретклифф. Ҳар икки харидорнинг дастлабки таклифи Глейзерлар томонидан рад этилганди.
Sky Sports нашрининг хабар қилишича, шайх Жассим делегацияси 16 март куни “Манчестер Юнайтед” вакиллари билан музокара олиб борган ва у муваффақиятли ўтган. Шайхнинг маслаҳатчилари янги шартнома тайёрлайди ва у 22 март оқшомга қадар инглиз клубига тақдим этилади.
“Манчестер Юнайтед” эгалари клуб учун 6 миллиард фунт атрофида пул сўрамоқда. Аввалига қатарликлар бу қадар кўп пул тўламаслиги айтилганди, бироқ “Олд Траффорд”га ташрифдан кейин араб инвесторларининг позицияси ўзгарган. Sky Sports Нью-Йоркдаги манбаларига таяниб қайд этишича, шайх Жассим “Манчестер Юнайтед”нинг янги эгаси бўлишига ҳеч қандай шубҳа йўқ.
Яна бир харидорлардан бири Жим Ретклифф эса клубни сотиб олишга қизиқиши борлиги, бироқ бунинг учун катта миқдорда пул сарфлаш нияти йўқлигини маълум қилди.
Суратнинг нархи қандай аниқланади? Уйники-чи? Бу бўёқ ёки қурилиш қанчага тушгани билан ўлчанмайди. Бироқ ақл бовар қилмас қийматдаги пулни тўлаш ҳам ёқмайди, чунки оқибатда бундан афсусланасан, — деган Ретклифф.
Аввалроқ клубни сотиб олган инвестор арена реконструкция қилиш ёки янги стадион қуриши кераклиги ва бу яна 2 миллиард фунтга тушиши хабар қилинганди.
