Футбол бўйича Ўзбекистон ёшлар терма жамоаси U-20 Осиё Кубоги—2023 ғолибига айланди. Ўзбекистонлик ёшлар финалда Ироқни мағлуб этди (1:0).

Ўзбекистон учта ёш тоифасида Осиё чемпионлигини қўлга киритган бешинчи мамлакатга айланди. Ўсмирлар ўртасидаги Осиё чемпионати 2012 йилда қўлга киритилган бўлса, 23 ёшгача бўлган футболчи ўртасидаги ғолиблик 2018 йили қайд этилган.

Бунга қадар Жанубий Корея, Япония, Саудия Арабистони ва Ироқ мазкур треблга эришганди. Қайд этиш керак, Ўзбекистондан фарқли ўлароқ юқоридаги тўрт мамлакат катталар ўртасидаги Осиё Кубогида ҳам зафар қучган.

Ўзбекистон U-20 терма жамоаси бош мураббийи Равшан Ҳайдаров иккинчи марта Осиё чемпионлигини қўлга киритди. Хитойда ўтган У-23 Осиё Кубоги—2018 да ҳам Ҳайдаров қўл остидаги жамоа чемпион бўлганди.