“ПСЖ” кетма-кет 2-мавсум Франция Кубогини эрта тарк этди. Месси ушбу мусобақада бирорта ғалабага эришмади

“ПСЖ” Франция Кубоги 1/8 финалида “Марсель”га имкониятни бой бериб (1:2), мусобақа билан хайрлашди.

Парижликлар кетма-кет иккинчи мавсум кубокни эрта тарк этмоқда. 2022 йилда ҳам жамоа “Ницца”га қарши баҳсда пенальтилар сериясида ютқазиб, 1/8 финалда ўз юришини тўхтатганди.

Бунга қадар “ПСЖ” 2015—2021 йилларда кетма-кет етти мавсум финалда ўйнаганди. Бу оралиқда жамоа олти марта кубокни қўлга киритган ва бир марта ютқазган.

Лионель Месси “ПСЖ” сафида Франция Кубоги доирасида ўтган иккинчи ўйинда ҳам мағлуб бўлди. Ўтган мавсумдаги “Ницца”га қарши баҳсда ҳам Месси майдонга тушганди. Аргентиналик футболчи бу турнирда 10-рақам остида ҳаракат қилади.

“Марсель” 2011 йилнинг ноябридан кейин илк бор ўз уйида “ПСЖ”ни мағлуб этишга эришди. “Олимпиячилар” сўнгги 12 йил ичида 9 марта Париж клубига 9 марта ютқазганди.