“Челси” Англия футболидаги рекорд нарх эвазига Энсо Фернандесни сотиб олди

“Бенфика” ярим ҳимоячиси Энсо Фернандес фаолиятини “Челси”да давом эттиради.

Бу ҳақдаги маълумот дастлаб Португалия қимматли қоғозлари бозори комиссияси сайтида пайдо бўлди. Кейинроқ лиссабонликлар трансферни тасдиқлади.

Лондонликлар клуби 22 ёшли футболчи учун “Бенфика”га 121 миллион евро тўлайди. Ушбу миқдор бир неча қисмга бўлиниб тўланади.

Футболчининг “кўклар” билан шартномаси 2031 йилнинг ёзига қадар мўлжалланган.

121 миллион евро (105 миллион фунт) — Англия футболи тарихидаги энг қиммат трансфер. Бунга қадар энг қиммат трансфер сифатида “Астон Вилла”дан 100 миллион фунт эвазига “Манчестер Сити”га ўтган Жек Грилиш қайд этилганди.

Аргентиналик “Челси” қишки трансфер ойнасида олиб келган саккизинчи ўйинчи бўлди. клуб Тодд Боули раҳбарликка келганидан кейин жами 16 та харидни амалга оширди.

Фернандес “Бенфика” сафида 2022 йилнинг ёзида “Ривер Плейт”дан бориб қўшилганди.

Энсо Аргентина сафида ЖЧ—2022 да ғолибликни қўлга киритди. У Қатар мундиалининг энг яхши ёш ўйинчиси деб топилганди.