Элдор Шомуродов ижара асосида Италиянинг бошқа бир жамоасига ўтади 

“Рома” ҳужумчиси Элдор Шомуродов ижара асосида “Специя”га ўтади.

Сўнгги бир неча ҳафта мобайнида ўзбекистонлик футболчига турли клублардан қизиқиш бўлаётганди. 

Элдор жорий мавсум жуда кам ўйин амалиётига эга бўлмоқда ва шу сабабдан римликлар сафини тарк этишга қарор қилган. Шомуродов фаолиятини Италиянинг бошқа бир жамоасида давом эттиради.

Sky Sports нашрининг хабарига кўра, “Специя” Шомуродовни ижарага олиш бўйича келишувга эришган. Шомуродовнинг ўзи ҳам А Серия клубига ўтишга розилик берган. 

“Специя” “Рома”га ижара учун 1,5 миллион евро тўлаб бериши кутилмоқда.