Германия шимолида пичоқ билан қуролланган эркак шаҳарлараро поездда йўловчиларга ҳужум қилди. Камида икки киши ҳалок бўлди, етти киши яраланди, деб хабар бермоқда France 24.
Ҳодиса Гамбург ва Кил шаҳарлари орасида қатнайдиган поездда содир бўлди, дея маълум қилди полиция вакили, жароҳатланганлардан 3 нафарининг аҳволи оғир.
Қайд этилишича, 33 ёшли гумонланувчининг келиб чиқиши фаластинлик, фуқаролиги йўқ. У Брокштедт шаҳридаги темир йўл вокзалида қўлга олинган ва енгил жароҳатлар билан касалхонага ётқизилган.
“Ҳужумдан сўнг гувоҳлар гумондорни полиция Брокштедт вокзалига етиб келгунига қадар ушлаб туришга муваффақ бўлган”, — дейилади полиция баёнотида.
Шунингдек, ҳужум сабабларини ўрганишда асосий эътибор “барча йўналишлар”, жумладан, эҳтимолий экстремизм ёки ҳужумчининг психологик муаммоларига қаратилгани таъкидланди.
Федерал ички ишлар вазири Ненси Феатҳер ҳужумни “ларзага соладиган янгилик” деб атади ва “бу даҳшатли ҳаракат” қурбонлари ва уларнинг оилаларига қайғураётганини билдирди.
Изоҳ (0)