Давлат хавфсизлик хизмати ва Ички ишлар бошқармалари ҳамкорликда республика бўйлаб гиёҳванд модда савдосига чек қўйиш бўйича тадбир ўтказди. Унда Тожикистондан келтирилган қарийб 5 килограмм наркотик модда мусодара қилинди.
Жумладан, Навоий вилояти Кармана туманида Spark тўхтатиб текширилганда, унда йўловчи сифатида кетаётган 1999 йилда туғилган, муқаддам судланган А.Б.нинг ёнида 992 грамм гашиш борлиги аниқланиб, процессуал тартибда расмийлаштириб олинган.
ДХХ ва ИИБ ходимлари томонидан олиб борилган суриштирув ҳаракатлари давомида у наркотик моддани Ургут туманида истиқомат қилувчи, 1996 йилда туғилган, муқаддам судланган Т.М.дан сотиб олганлиги маълум бўлиб, у ҳам қўлга олинган. Ўз навбатида ушбу наркосавдогар гиёҳванд моддани Самарқанд шаҳрида яшовчи фуқаролардан харид қилгани аниқланди ва унинг иштирокида назорат остида олиш тезкор-қидирув тадбири ўтказилган.
Жумладан, Самарқанд шаҳрида яшовчи 1991 йилда туғилган муқаддам гиёҳвандлик воситалари билан боғлиқ жинояти учун судланган аёл Х.Х. ва унинг турмуш ўртоғи, 1982 йилда туғилган Х.Ф. 2 килограмм 966 грамм гашиш моддасини 21 минг долларга сотаётган вақтларида ушланган. Бундан ташқари, тезкор тадбир давомида Булунғур туманида яшовчи, 1985 йилда туғилган Х.М. ҳам 954 грамм опий моддасини Самарқанд шаҳрида сотаётган вақтида қўлга олинган.
Текширувлар давомида ушбу гиёҳвандлик воситалари Тожикистондан контрабанда йўли билан келтирилгани аниқланган. Ҳолат юзасидан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)