Twitter ижтимоий тармоғи фойдаланувчилари сони бир ярим йил ичида ойига бир миллиард кишига етиши мумкин. Бу ҳақда Илон Маскка таяниб «РБК» хабар бермоқда.
Маск ходимлар учун ўтказилган тақдимотдан слайдларни намойиш этди. Унда хавфсиз хабар алмашиш, узун твитлар ёзиш ва бошқа функцияларга эга бўлган ижтимоий тармоқнинг янги версияси — Twitter 2.0 The Everything Аpp иловаси ҳақида гап боради.
Тақдимотга кўра, ноябрь ойи ўрталарида кунлик рўйхатга олинган янги фойдаланувчилар сони 2 миллионга етган, бу ўтган йилнинг шу вақтига нисбатан 66 фоизга кўпдир.
Бундан ташқари, Маскнинг сўзларига кўра, фойдаланувчилар ўртасида ижтимоий тармоқда ўтказилган вақт ўтган ҳафтада кунига 8 миллиард фаол дақиқани ташкил этган.
Мен 12-18 ой ичида Twitter фойдаланувчилари сони ойига бир миллиардга етиши истиқболини кўрмоқдаман, — деб ёзди у.
Илон Маск октябрь охирида Twitter’ни 44 миллиард долларга сотиб олиш бўйича битимни якунига етказди. Ёзда у олди-сотди битимидан бош тортишга уринган эди, бироқ суд уни ижтимоий тармоқни сотиб олишга мажбур қилди. Бу воқеалар фонида Маскнинг бойлиги апрелдан буён 70 миллиард долларга камайди.
Ижтимоий тармоқни сотиб олганидан кейин Маск компания ходимларининг ярмини, шу жумладан, бош директор Параг Агравални, молия директори Нед Сегални, бош ҳуқуқшунос Вижаю Гаддени ва бошқа бир қатор топ-менежерларни ишдан бўшатди.
Bloomberg маълумотларига кўра, Маскнинг янги жамоасидаги икки раҳбар ходим — Ёэл Рот ва Робин Уилер истеъфо берган. Аввалроқ эса Twitter’нинг ахборот хавфсизлиги бўлими бошлиғи Леа Кисснер ҳам ишдан бўшаб кетганди.
Илон Маскнинг ўзи эса ходимларига юборган биринчи мурожаатида компания банкрот бўлиши мумкинлигини билдирган.
Маск верификация белгиси (кўк «галочка») учун тўлов жорий этилиши ҳақида шу ой бошидаёқ эълон қилганди. Бу аввалроқ уни бепул қўлга киритган таниқли шахслар ва компаниялар профилларига ҳам тегишли бўлади.
Изоҳ (0)