Келгуси беш йил ичида Озарбайжон Европага газ етказиб беришни икки баробарга ошириш ниятида. 2027 йилга бориб бу 20 миллиард куб метрни ташкил қилади. Бу ҳақда Озарбайжон президенти Илҳом Алиевга таяниб, «Коммерсантъ» хабар бермоқда.

Бу йил биз Озарбайжон ва Европа комиссияси ўртасида ўзаро англашув меморандумини имзоладик. Келгуси беш йил ичида Озарбайжон Европага табиий газ экспортини икки баравар оширишни режалаштирмоқда. 2027 йилгача Европага қарийб 20 миллиард куб метр табиий газ экспорт қилишни режалаштирмоқдамиз, — деди Алиев.

Унга кўра, жаҳон бозорларига нефть етказиб бериш ҳам Боку—Тбилиси—Жайҳон ва Баку—Супса нефть қувурлари орқали оширилади.

Озарбайжон ҳукумати Грузия ғарбидаги Супса қишлоғида жойлашган нефть терминалидан фойдаланишга умид қилмоқда.

18 июль куни Озарбайжон ва Европа комиссияси Бокуда энергетика соҳасида ҳамкорлик бўйича меморандум имзолади, у Жанубий газ йўлаги (SGC) қувватини икки баробар оширишни ўз ичига олади.

Аввалроқ Европада газ нархи кескин пасайгани ҳақида хабар берилганди.