Ўзбекистонда кадастр ҳужжатлари бўлмаган хонадонларга ер солиғини уч карра ошириб ҳисоблаш амалиёти вақтинча тўхтатиб турилади

Шавкат Мирзийиев 18 июль куни ўтказилган йиғилишда кадастр ҳужжатлари билан боғлиқ муаммога тўхталиб ўтди. Бу ҳақда президент матбуот котиби хабар қилди.

Қайд этилишича, 2 миллион 600 мингта аҳоли хонадонларининг кадастр ҳужжатлари йўқ. Ушбу аҳоли томорқа учун кредит, субсидия ҳамда уй-жойини кенгайтиришга ипотекадан фойдалана олмаётгани ҳақида Халқ қабулхоналарига мурожаатлар тушмоқда. Шунингдек, кадастри бўлмагани учун ер солиғи 3 карра миқдорда ҳисобланмоқда.

Шу боис Адлия вазирлиги, Солиқ қўмитаси, Кадастр агентлигига бир ҳафта муддатда ишчи гуруҳларини шакллантириб, ишларни бошлаш топширилган. Ишчи гуруҳлари:

• 1 октябрга қадар маҳаллабай кадастр ҳужжати бўлмаган хонадонларнинг электрон рўйхатини шакллантиради;
• уй-жойга бўлган ҳуқуқларни эътироф этишга асос бўлувчи ҳужжатларни тўплайди ва электрон базага киритади.

Мутасаддиларга республиканинг барча ҳудудларида кадастри йўқ хонадонлар масаласини узил-кесил ҳал қилиш учун алоҳида қонун лойиҳасини ишлаб чиқиб, муҳокамага киритиш вазифаси қўйилган.

Янги қонун қабул қилингунига қадар бу уй-жой эгаларига уч карра оширилган солиқ қўллаш тўхтатиб туришга қарор қилинган.